Ирон фӕдзӕхсӕнтӕ

0
184

Абон бирӕтӕ нӕ зонынц, дзырд «фӕдзӕхсӕн» иронау «амулет» кӕй амоны, уый. Дины ныхмӕ тох кӕныны заман ацы культурон термин хъодыгонд ӕрцыд, ӕмӕ йӕ суанг  ӕвзагиртасджытӕ дӕр нал хастой сӕ дзырдуӕттӕм. Афтӕмӕй та фӕдзӕхсӕн хауы нӕ удварны тӕккӕ рагондӕр хӕзнатӕм. Нӕ фыдӕлтӕй иузӕрдион ӕмбӕлццон рохуаты куы баззайа, уӕд Ирыстоны историон нывӕй фесӕфдзӕн хуызджын ахорӕнтӕй иу.

Дуры рагондӕр заман палеолитӕй фӕстӕмӕ нӕлгоймӕгтӕ ӕмӕ сылгоймӕгтӕ сӕ уӕлӕдарӕс фӕлыстой алыхуызон аивгӕнӕнтӕй, нывӕфтыдтӕй. Рӕсугъддзинадӕй уӕлдай сӕ сӕйраг, сусӕг нысан уыд фыдӕхӕй, низӕй, цӕстдзыдӕй хъахъхъӕнын. Рагон адӕймаджы уырныдта, кӕлӕнгӕнӕджы бон кӕй у кӕцыдӕриддӕр цӕрӕгойы кӕнӕ дзаумайы хуыз райсын, адӕмы мыггаг  та кӕй равзӕрд сырдтӕй, мӕргътӕй, зайӕгойтӕй. Уӕды рӕстӕджы-иу алы адӕмыхаттӕн дӕр уыд, сӕхи кӕуыл фӕдзӕхстой, ахӕм сӕрмагонд тотем — арс, рувас, цӕргӕс ӕмӕ афтӕ дарддӕр.

Тотемы символ — амулет нымад уыд, йӕ хицауы фыдбылызӕй цы хизы, ахӕм табуйаг дзаумайыл. Уыдысты ахӕм хуызтӕ: тотемы буары хай (арсы ссыр, рувасдзармы тӕлм, уарийы сис), тотемы сурӕт, фигуркӕ кӕнӕ йӕ стилизацигонд ныв — нывӕфтыд. Хъахъхъӕнӕн тыхы хицау ма уыдысты царддӕттӕг хуры символтӕ (къори, фӕрдыг, рон, тӕлы, зиллакк), иуӕй-иу згъӕртӕ (сыгъзӕрин, ӕфсӕйнаг), сырды кӕнӕ маргъы къах, адӕймаджы арм. Ахӕм ӕмбарынады фарс сты ӕвзагзонынады факттӕ дӕр. Уӕдӕ ирон дзырдбаст «арм дарын» абон дӕр нӕ фӕсайдта йӕ тӕккӕ рагондӕр нысаниуӕг — аудын, хъахъхъӕнын.

Адӕймаджы уырныдта, арсы дӕндаг — хъару, бирӕгъы ных — къӕрцхъусдзинад, сагдзарм та — рӕуваддзинад кӕй дӕтты, уый. Фӕдзӕхсӕнты архайд ӕргом кодта сӕ бакасты, стӕй уынӕры дӕр. Цӕвиттон, хъуытазтӕ ӕмӕ мырмырӕгтӕ фыдбылыз сырдтой сӕ дзыгъал-мыгъулӕй, уадындз — йӕ зӕлланг уастӕй. Дыууӕсӕрон фӕдзӕхсӕнтӕ амыдтой дунейы дывӕр сконд, ӕмӕ сӕ хицауы хъахъхъӕдтой канд зӕххон царды нӕ, фӕлӕ ма мӕрдты бӕстӕйы дӕр. Иннӕ индоевропӕйаг адӕмты ӕмхуызон нӕ фыдӕлтӕ рахиз фарс нымадтой растыл, галиу фарс та — хӕрамыл, ӕнӕкъай нымӕцтӕ бастой уӕлион цардимӕ, ӕмкъай нымӕцтӕ — дӕлион дунеимӕ.

Уӕдӕ цавӕр уыдысты ирон адӕмы рагфыдӕлты фӕдзӕхсӕнтӕ? «Историйы фыд» Геродот, ӕндӕр рагон автортӕ нын куыд хъусын кӕнынц, афтӕмӕй скифтӕ ӕмӕ сӕрмӕттӕ сӕхи фӕдзӕхстой ӕрдзы тыхтыл, сырдтыл ӕмӕ мӕргътыл, хӕцӕнгӕрзтыл. Сӕ табуйаг дзаумӕттыл ныв кодтой хур ӕмӕ мӕйы символтӕ, бирӕгъы, аццы (хъӕддаг бабыз), уарийы, хӕдзарон цӕрӕгойты (гал, цӕу, фыр), сӕ бӕхты та фӕлыстой цъиуты ӕмӕ базырджын  кӕфхъуындарты сурӕттӕй.

Уӕлдай арӕхдӕр фӕдзӕхсӕнты ‘хсӕн ӕмбӕлынц саджы дедатӕ. Ацы рӕсугъд сырд, ӕвӕццӕгӕн, уыд нӕ фыдӕлты сӕйраг тотемтӕй иу. Бӕрӕг куыд у, афтӕмӕй Астӕуккаг Азийы скифты хуыдтой «сактӕ». Зындгонд ахуыргонд Джордж Вернадскийы хъуыдымӕ гӕсгӕ, сӕрмӕттаг знӕм аланты ном равзӕрд рагон индоевропӕйаг дзырд «елен»-ӕй (уырыссаг «олень»)

Этнограф Татьянӕ Равдоникас куыд сбӕрӕг кодта, афтӕмӕй тотемаг цӕрӕгойы цармы уаццӕгтӕ скифтӕ хуыдтой куырӕтты ӕфцӕгготтыл, фӕдджитыл, худыл. Дыууӕ мин азы размӕ нӕ фыдӕлты фӕдзӕхсӕнтыл ма нымад уыдысты фырыхъултӕ, рувас ӕмӕ тӕрхъусы фадхъулы стджытӕ, бӕх ӕмӕ  барӕджы, цӕуы, фыры, калмы, хъӕндил — скарабейы фигуркӕтӕ — дедатӕ, мырмырӕгтӕ, ӕвзист ӕмӕ бронзӕ айдӕнтӕ, фӕрдгуытӕ. Фӕрдгуытӕ хуыдтой уӕлӕ- ӕмӕ къахыдарӕсыл дӕр. Цӕугӕдон Днестры былгӕрон чи цард, уыцы сӕрмӕттаг сылгоймаджы зӕнгӕйттыл хуры фӕлгонцтӕ хуыд уыдысты цыппӕргай рӕнхъытӕй, фӕйнӕ 78 фӕрдыджы. Айдӕнтӕ та-иу зиан бавӕрыны размӕ асастой ӕмӕ сӕстытӕ ӕппӕрстой ингӕны.

Уӕды змӕст рӕстӕджы лӕгты сӕйраг фӕдзӕхсӕнтӕ уыдысты сӕ хӕцӕнгӕрзтӕ: цирхъ, кард, фат ӕмӕ ӕрдын, сагъадахъ, уарт, згъӕр хӕдон ӕмӕ худ (така), арц. Царды фӕндӕгтыл-иу сӕ хицауы хъахъхъӕдтой фыдызнаг ӕмӕ фыдбылызӕй, хӕстон-иу куы амард, уӕд ын сӕ ныгӕдтой йӕ фарсмӕ. Хӕцӕнгарз цӕмӕй кодтой, уыцы хъӕбӕр згъӕр (ӕфсӕйнаг, ӕндон дӕр) нымадтой табуйагыл. Археолог Верӕ Ковалевская фыссы, зӕгъгӕ, VI-IX ӕнусты Доны былыл цӕрӕг алантӕ сӕ фӕдзӕхсӕнты фылдӕр хай арӕзтой згъӕрӕй.

Нӕ рагфыдӕлты тотемтӕ ӕмӕ фӕдзӕхсӕнты темӕ бӕрӕг дары ирон адӕмы сфӕлдыстады — скифаг-сӕрмӕттаг дуг цымыдисаг хуызы чи ӕвдисы, уыцы Нарты кадджыты мифологон зарджытӕ ӕмӕ аргъӕутты. Иуцалдӕр дӕнцӕджы уын дзы ногӕй уӕ зӕрдыл ӕрлӕууын кӕндзыстӕм. Кадӕг «Тотырадз ӕмӕ Сослан»-ы амынд цӕуы, зӕгъгӕ, бирӕгъдзӕрмттӕй хуыд кӕрц асуры дӕлимонты хаст бӕхы. Талынг тыхтӕ бирӕгъӕй сӕ удхӕссӕг уынынц «Хӕйрӕджыты зарӕджы».

Хӕйрӕджытӕ зарынц:

«Уӕхи хъахъхъӕнут къуыбырхъусӕй,

Йӕ цӕстытӕ нӕ цъынд кӕны —

Фесӕфта нӕ мыггаджы».

Бирӕгъ нӕ фыдӕлты сӕйрагдӕр тотемтӕм кӕй хауд, ууыл дзурӕг сты ӕндӕр ӕрмӕджытӕ дӕр. Абайты Васо куыд сбӕрӕг кодта, афтӕмӕй Нарты ӕхсӕртӕггаты хистӕры ном Уӕрхӕг рагон ирон ӕвзаджы амыдта «бирӕгъ». Кадджытӕм гӕсгӕ, Сослан бирӕгъы ӕхсыры йӕхи куы байсӕрдын кӕны, уӕд йӕ буар сыгъдӕг болат фестад — кард ӕй нал карста, фат дзы нӕ хызти. Тыхст уавӕры куы бахауд, уӕд ӕм иннӕ сырдтӕй уӕлдай бирӕгъ знаджы цӕстӕй нӕ ракаст, ӕмӕ йын Нарты хъӕбатыр раарфӕ кодта: «Фосмӕ бацӕуынмӕ дын мӕ зӕрдӕ куыд уа, раздӕхынмӕ та — ӕнӕкуырд чызджы зӕрдӕ, дӕ бӕрзӕйы та мӕ кӕстӕр ӕнгуылдзы хъару куыд уа».

Иннӕ кадӕджы амынд цӕуы, зӕгъгӕ, Уырызмӕг цӕудзармы руаджы фервӕзы мӕлӕтӕй. Бодзы царм ӕд сыкъатӕ йӕ уӕлӕ ӕркӕны  ӕмӕ афтӕмӕй рацӕуы уӕйыджы лӕгӕтӕй. Дзӕбӕх ахорӕнтӕй эпос ныв кӕны сау сынт ӕмӕ арсы, Нарты уарзондӕр маргъыл та нымад у Хуыцауы минӕвар — зӕрватыкк. Бирӕ хӕрзтӕ фӕцис Нарты адӕмӕн: Сатанайӕн бацамыдта, уӕларвон нуазинаг — бӕгӕны кӕнгӕ кӕй у хъӕбӕрхор ӕмӕ хуымӕллӕгӕй, Сослан дард балцы куы уыд, уӕд ын фехъусын кодта йӕ мады хабар, ӕхсӕртӕггатӕм та хъӕргӕнӕг фӕцис. Сосланы арфӕ зӕрватыккӕн, ӕцӕгдӕр, сӕххӕст и ӕмӕ саджилдымӕг маргъ дӕр нымад у ирон адӕмы лымӕныл, йӕ поэтикон эпитет та у уалдзӕггӕнӕг.

Эпикон чиныджы сыфтыл фембӕлӕн ис ӕнӕнымӕц диссӕгтыл. Кадджытӕм гӕсгӕ, мард ӕгас кӕныны тых ис цыкурайы фӕрдыгмӕ, сыгъзӕрин фӕткъуы дзӕбӕх кӕны хъӕдгӕмттӕ, ирвӕзын кӕны низтӕй. Сосланы хъул куы азилай, уӕд дзы йӕ хицауы фӕндонмӕ гӕсгӕ куы зынг сирвӕзы, куы къӕвда рацӕуы, куы та хъӕрццыгъатӕ алиуырынц. Мад йӕ фыртыл ауды суанг мӕрдты бӕстӕйы дӕр, уӕйыджы къухдарӕн зоны хъӕр кӕнын, ехсы цӕф адӕймаджы фестын кӕны куыдз, ефс кӕнӕ хӕрӕг, залиаг калмӕй конд ӕвзалы сзынг кӕны Нарты хъӕбатыры, кӕннод ӕй байсӕрыны заман хуымӕтӕг ӕвзалы нӕ тӕвд кӕны.

Фольклор иртасджытӕ Нарты кадджытӕ фӕлгонцджынӕй хонынц ӕфсӕйнаджы кады зарӕг. Ӕцӕгдӕр, хъӕбӕр згъӕрӕй конд дзаумӕтты адӕмы фантази фӕхайджын кодта табуйаг, ӕмбисонды миниуджытӕй. Уӕларвон куырдадзы арӕзт хъуытазты ӕмӕ мырмырӕгты цагъдӕй хаст бӕх лидзы дӕлимонтӕм. Хӕстмондагӕй цъӕх арт чи уадзы, уыцы хӕцӕнгӕрзтӕ та ӕвдыст цӕуынц, цыма цӕрдуд сты, афтӕ: Церечы згъӕр хӕдон хӕсты коймӕ йӕхӕдӕг фесты йӕ хицауы уӕлӕ. Бидасы така (згъӕр худ) та йӕхӕдӕг абады лӕджы сӕрыл, ӕмӕ уӕд хӕстоны кард нал кӕрды, фат дзы нал хизы.

Мангол Аланты паддзахады куы басастой, уӕд тыгъд быдыртӕй нӕ фыдӕлтӕ балыгъдысты хохмӕ. Зынвадат рӕтты цӕргӕйӕ, нӕ ферох кодтой сӕ рагон ӕвзаг ӕмӕ хӕдбындур культурӕ, сӕ бон бахъахъхъӕнын бацис, рӕстӕгӕн сӕттын чи нӕ бакуымдта, уыцы ӕгъдӕуттӕ ӕмӕ уырнындзинӕдтӕ. Сӕдӕ азы размӕ ма ирон адӕм сӕхи фӕдзӕхстой уӕларвон куырд Сафайыл, цӕмӕй сӕ сӕ номыл конд ӕфсӕйнаг фӕдзӕхсӕнтӕ хызтаиккой фыдбылызӕй, цӕстдзыдӕй, низӕй.

1882 азы академик Всеволод Миллер фыста, зӕгъгӕ, Сафайы номыл фӕдзӕхсӕнтӕ ирӕттӕ кӕнынц мартъийы, стыр мархойы  ӕртыккаг бон, ӕртыццӕджы. Уый размӕ та, бирӕгъты бардуаг Тутыры дыццӕджы кӕй фӕдзӕхстой, уымӕ гӕсгӕ сывӕллӕттӕ ком дардтой.  Ацы бӕрӕгбоны тыххӕй 1927 азы лӕцаг 111-аздзыд Дулаты Дӕхцыхъо радзырдта: “Куырд-иу сабийы къух хъӕсдарӕгыл ӕрӕвӕрдта, дзӕбугӕй йӕ ӕрхоста ӕмӕ-иу загъта: «Тутыры уазӕг Сафайы фӕдзӕхст у!» Уый фӕстӕ-иу ын йӕ хъуырыл бабастой ӕфсӕйнагӕй конд гыццыл цӕг (къӕрцгӕнӕйнаг) чиныгимӕ. Куыд нымадтой, афтӕмӕй сывӕллонӕн афӕдзмӕ цӕстдзыдӕй, хӕйрӕджыты сайдӕй тӕссаг нӕ уыд.

Нӕлгоймӕгтӕн ӕмӕ сылгоймӕгтӕн куырд арӕзта ӕфсӕйнаг къух ӕмӕ цонгдарӕнтӕ. Арфӕ сын кодта Тутыр ӕмӕ уӕларвон Сафайӕ. Уыцы фӕдзӕхсӕнтӕ дӕр афӕдз ӕххуыс кодтой. Фӕдзӕхсӕггаг уыд ӕртӕ чъирийы ӕмӕ бӕгӕныйы дурын. Тутыры дыццӕджы ма фӕдзӕхстой галты. Уыцы бон-иу куырд скодта тӕбынг, ӕмӕ йӕм хӕссынмӕ цыдысты, ӕрмӕстдӕр ком чи дардта, уыцы адӕймӕгтӕ”.

Зындгонд этнограф Г.Чурсин куыд фыссы, афтӕмӕй ма ирӕттӕ фӕдзӕхсӕнтыл нымадтой бирӕгъ ӕмӕ арсы  дӕндӕгтӕ дӕр. Сӕ хицауы хъуамӕ хъахъхъӕдтаиккой цӕстдзыдӕй. Фӕдзӕхсӕнтӕ ма уыдысты басылтӕ-дедатӕ дӕр. Скодтой-иу сӕ 22 декабры сихорафон. Уымӕн ӕмӕ уыцы бон Хур ӕрвгӕроны сӕрмӕ вӕййы ӕппӕты ныллӕгдӕр. Басылтӕ уыдысты саджы, фыры, дзӕбидырты хуызӕн, кӕнгӕ та сӕ кодтой, ног азы сӕм хъомвос ӕмӕ фысвос бирӕ куыд уыдаид, уый тыххӕй. Афтӕмӕй ирӕттӕ дарддӕр хӕццӕ кодтой фыдӕлты ӕгъдау.

Цогойты Валодя,

историон наукӕты кандидат

ОСТАВЬТЕ ОТВЕТ

Please enter your comment!
Please enter your name here