Дохтыртӕ куыд бафиппайдтой, афтӕмӕй сӕрдыгон адӕм сӕхи цӕвгӕ арӕхдӕр кӕнынц, зӕгъӕм, сывӕллӕттӕ — хъазгӕ-хъазын, хистӕртӕ та — цӕхӕрадоны кусгӕйӕ, улӕфыны рӕстӕг ӕмӕ афтӕ дарддӕр. Ахӕм цӕфтӕ кӕд лыстӕг сты, уӕддӕр сӕм инфекци бахауынӕй у тӕссаг. Уымӕ гӕсгӕ ӕвзӕры фарст — инфекци цӕфмӕ куыднӕ бахауа, уымӕн цы саразӕн ис?
Сыгъдӕг дон зиан нырма никуы никӕмӕн ӕрхаста, ӕмӕ, фыццаджыдӕр, цӕф хъӕуы сыгъдӕг донӕй ӕрыхсын, афтӕмӕй йӕ бахъахъхъӕндзыстут чъизитӕй, туг дӕр фӕуромдзӕн, рыст дӕр фӕкъаддӕр уыдзӕн.
Уый фӕстӕ цӕф хъӕуы байсӕрдын, инфекцийӕ йӕ чи бахъахъхъӕндзӕн, ахӕм хос, медицинон ӕвзагыл — «антисептик». Уыдонмӕ хауынц, рагӕй кӕй зонӕм, уыцы йод ӕмӕ зеленкӕ, фӕлӕ сӕ дзӕбӕхгӕнӕн миниуджытӕм гӕсгӕ сӕ дохтыртӕ абон нымайынц, чи базӕронд, ахӕм хостыл. Ныртӕккӕ фӕзынд бирӕ ног хостӕ, адонӕй ахадгӕдӕр чи у, ахӕмтӕ. Зӕгъӕм, афтекты ис, цӕф тагъддӕр чи байгас кӕны, ахӕм дзӕбӕхгӕнӕн крем. Зеленкӕ ӕмӕ йодӕй цӕф дудын райдайы, уымӕ гӕсгӕ сӕ фӕсӕрдынц цӕфӕн йӕ алывӕрстӕ. Гыццыл сывӕллон ахӕм процедурӕйӕн тынг зынтӕй фӕразы. Кремӕй та ис байсӕрдӕн цӕф ӕнӕхъӕнӕй дӕр, ӕмӕ дудгӕ дӕр нӕ кӕндзӕн, стӕй ма тагъддӕр байгас уыдзӕн.
Цӕфтӕ дзӕбӕхгӕнӕн кремӕн йӕ дарын у ӕнцон, сӕрмагонд уавӕртӕ нӕ домы ӕмӕ дзы пайдагӕнӕн ис куыд гыццыл сывӕллӕтты дзӕбӕх кӕнгӕйӕ, афтӕ хистӕр кары адӕймӕгты дӕр.
Уый фӕстӕ цӕф хъӕуы ныхгӕнын, бактеритӕй йӕ чи хъахъхъӕндзӕн, ахӕм пластырӕй, цӕф стыр куы уа, уӕд та йӕ хъӕуы бинтӕй бабӕттын. Цӕф ранмӕ базилын хъӕуы суткӕмӕ иу хатт — ногӕй йӕ байсӕрд дзӕбӕхгӕнӕн кремӕй, стӕй та йыл ног бинт кӕнӕ пластырь бакӕн.
Ацы хуымӕтӕг амынддзинӕдтӕ куы ӕххӕст кӕнат, уӕд цӕф тагъддӕр адзӕбӕх уыдзӕн ӕмӕ ницы расайдзӕн. Фӕлӕ цӕфӕн йӕ алыварс буары царм куы ныссырх уа ӕмӕ куы барӕсийа, рыст ӕгӕр-ӕгӕр куы кӕна, цӕф та хӕф кӕнын куы райдайа, уӕд уӕ, ӕнӕмӕнг, бахъӕудзӕн дохтыры ӕххуыс, ӕмӕ хирургмӕ батагъд кӕнут.
Медицинон профилактикӕйы республикон центр
