Ӕппӕтуӕрӕсеон адӕмон фронты цӕгатирыстойнаг активисттӕ «Бирӕсывӕллонджын бинонты иугонд»-имӕ иумӕ нӕ республикӕйы цыбыркъух бинонтӕн скъоламӕ кӕстӕр кълӕсты ахуырдзауты бацӕттӕ кӕнынӕн баххуыс кодтой.
Меценатты ӕххуысӕй ног ахуыры азы агъоммӕ сывӕллӕттӕн балӕвар кодтой скъолайы фӕлыст, пъартфелтӕ ӕмӕ къӕнцыларон дзаумӕттӕ.
— Уыцы-иу рӕстӕг цалдӕр скъоладзауы кӕм хъомыл кӕнынц, ахӕм цыбыркъух бинонтӕн скъоламӕ ахуырдзауты бацӕттӕ кӕнын ӕнцон нӕу. Фӕкӕсинӕгтӕн ӕххуыс кӕныныл архайӕм, — зӕгъы Адӕмон фронты регионалон штабы уӕнг, ӕхсӕнадон организаци «Бирӕсывӕллонджын бинонты иугонд»-ы разамонӕг Дзоблаты Альбинӕ.
Дзӕуджыхъӕуы ацӕуӕг акцийӕн фадӕттӕ саразджытӕ лӕппутӕн бацӕттӕ кодтой уӕлӕдарӕс, спортивон майкӕтӕ ӕмӕ хызынтӕ, чызджытӕн та балӕвар кодтой къабатӕ, сарафантӕ ӕмӕ пъартфелтӕ. Уымӕй уӕлдай, хӕрзаудӕн акцийы ӕппӕт архайджытӕ райстой скъоладзауӕн ӕмбӕлгӕ ифтонггӕрзтӕ. Бархиондзинадӕн ӕххуысы авналӕнты центр, хӕрзаудӕн фонд «Сывӕллӕтты дуне» ӕмӕ амалиуӕггӕнӕг Сильвӕ Акопян спонсорон ӕххуыс бакодтой.
Фӕкӕсинӕгты ӕхсӕн чи ис, ӕрвылаз ӕхсӕнадон организацийы уӕнгтӕ ӕрӕфы районы Лескены цӕрӕг Цъебойты Аллӕйы уыцы бинонтӕн хойрагӕй ӕмӕ ӕндӕр уагӕй баххуыс кӕнынц.
— Бирӕсывӕллонджын бинонтӕ цыфӕнды ӕххуысӕй дӕр райгонд вӕййынц. Нӕ лыггӕнинаг фарстатӕм ӕргом кӕй здахут, уый тыххӕй уын — бузныг. Абоны ӕххуыс нын ног ахуыры азмӕ сывӕллӕтты бацӕттӕ кӕнынӕн фӕахъаз уыдзӕн, — зӕгъы Цъебойты Аллӕ.
Акцийӕн фадӕттӕ саразӕг адӕм беслайнаг Хъаратӕн дӕр баххуыс кодтой. Цыппар сывӕллоны хъомыл кӕны сӕ нана Лорӕ.
— Зын уавӕры нӕ иунӕгӕй кӕй нӕ ныууагътой, ууыл бацин кодтам, уӕлӕдарӕс ӕмӕ пъартфелтӕ нын балӕваргӕнджытӕн — бузныг, — загъта Хъараты Лорӕ.
Акцийы фыццаг хай ӕххӕст кӕнгӕйӕ, ӕхсӕнадон организацийы уӕнгтӕ 30 бинонтӕн баххуыс кодтой. Рӕхджы ноджыдӕр ма цалдӕр бинонтӕм бахӕццӕ уыдзысты скъоладзаутӕн хъӕугӕ ифтонггӕрзтӕ.
Бӕдтиаты Оксанӕ
