Ацы бонты Цӕгат Ирыстоны профилон ведомствӕтӕ ӕххӕст кӕнын райдыдтой федералон программӕ «Цӕрӕнуӕттӕ — уӕрӕсейаг бинонтӕн»-ы уагӕвӕрдтӕ.
Уый тыххӕй фехъусын кодта РЦИ-Аланийы Аразтад ӕмӕ архитектурӕйы министрады пресс-службӕ.
«Ныридӕгӕн сбӕрӕг, программӕйы фӕлгӕты Дзӕуджыхъӕуы бирӕфатерон хӕдзӕрттӕ чи араздзӕн, уыцы подрядон компани. Ног хӕдзӕрттӕ кӕм ӕрбынӕттон уыдзысты, уыцы участоктӕ бӕлвырдгонд сты, арӕзтадон куыстытӕ райдайынӕн дӕр ӕппӕт хъӕугӕ гӕххӕттытӕ цӕттӕ сты. Ӕнӕххӕст бӕрнондзинады ӕхсӕнад «Цӕрӕнуатон-арӕзтадон компани» куыстытӕм ацы аз бавналдзӕн. Куыд нысангонд цӕуы, афтӕмӕй ног цӕрӕнуӕтты фыццаг цалдӕр мин квадратон метры эксплуатацимӕ лӕвӕрд ӕрцӕудзысты фидӕн азы», — радзырдта министрады пресс-службӕйы минӕвар.
Сӕрмагондӕй фӕбӕрӕг кӕнын хъӕуы, ацы программӕ нӕ республикӕйы Сӕргълӕууӕджы хӕстӕ рӕстӕгмӕ ӕххӕстгӕнӕг Сергей Меняйлойы хъӕппӕрисӕй ӕххӕст кӕнын кӕй райдыдтой, уый. Программӕйы фӕлгӕты республикӕйы цӕрджытӕн уыдзӕн ног цӕрӕнуӕттӕ асламдӕр аргъӕй балхӕныны фадат.
«Программӕйы архайынвӕнд чи скӕна, уыцы адӕмы куырдиӕттӕ бадӕттын хъӕуы бынӕттон муниципалитетты цӕрӕнуатон хайӕдтӕм. Уыимӕ, ахӕм куырдиӕттӕ бадӕттӕн уыдзӕн, куыстуӕттӕ ӕмӕ организациты цы сӕрмагонд къамистӕ арӕзт ӕрцӕуа, уыдонмӕ дӕр. Афтӕмӕй программӕ кусын райдыдта. Йӕ алкӕцы къӕпхӕны тыххӕй дӕр адӕмӕн афойнадыл хъусын кӕндзыстӕм», — журналисттӕн радзырдта арӕзтад ӕмӕ архитектурӕйы министры хӕстӕ рӕстӕгмӕ ӕххӕстгӕнӕг Моргуаты Константин.
Нӕ уацхӕссӕг
