Республикæ Цæгат Ирыстон-Аланийы хæлардзинады æмæ национ-культурон бастдзинæдты хæдзары уыд цæлхæмбырд. Ныхас дзы цыд æхсæнады зыгъуыммæ социалон фарстатæ аиуварс кæныны фæдыл федералон æмæ бынæттон закъонæвæрад æххæст кæныныл РЦИ-Аланийы организацитæ, уагдæттæ æмæ хицауады оргæнты æмархайдыл.
— Ацы фарста абон, хъыгагæн, тынг ахсджиаг у. Алкæмæн дæр нæ йæ бон бауыдзæн йæ хъуыдытæ зæгъын, йæ фæндон радзурын, сбæлвырд кæнын, æмæ уæд нæ куыст дæр уыдзæн ахадгæдæр, — загъта Республикæйы хæлардзинад æмæ национ-культурон бастдзинæдты хæдзары сæргълæууæг Александр Охотников.
Æрдзырдтой дзы, хъус дарын кæй хъæуы компьютерон клубтæм, айсын кæй хъæуы, кальянтæ кæм ис, ахæм бынæттæ, æвзæр митæ кæм кæнынц, уыцы саунæтæ, азартон хъæзтыты бынæттæ, брокерон къантортæ ставкæтæ кæм æвæрынц, уыдон.
Хуынд уазджытæ уыдысты прокуратæурæйы бæрнон кусджытæ, Цæгат Ирыстоны мидхъуыддæгты службæгæнджытæ, ахуыргæндтæ, Дзæуджыхъæуы муниципалон æмæ æнæниздзинад хъахъхъæнынады оргæнты минæвæрттæ.
Цæлхæмбырд амыдта Хъайтыхъты Тамарæ.
— Абон цы фарстайыл дзурæм, уый ног нæу нæ республикæйæн, афæдзы размæ дæр ма йыл дзырдтам, уæд ахæм уынаффæ рахастам, цæмæй фæкъаддæр кæнæм кальянтæ æмæ азартон хъæзтыты бынæттæ. Æмæ мæнæн мæ бон зæгъын у, хорз бæрæггæнæнтæ кæй ис, уый. Æрбацыдысты æхсæнады хуыздæр минæвæрттæ. Абон иумæ, кæрæдзимæ байхъусгæйæ, æрцæудзыстæм иу хатдзæгмæ. Алырдыгæй нæм цæуынц адæм, æмæ нæ хъуамæ зæрдæрайгæйæ здæхой, мах та ахæм æвзæр хабæртты бынæттæ дæлдзиныг кæнынц. Мæн фæнды сымахмæ абон фылдæр байхъусын æмæ уынаффæ рахæссын, — радзырдта Цæгат Кавказы хæххон-металлургон институты профессор, Цæгат Ирыстоны регионалон æхсæнадон организаци «Хетæгкаты Къостайы номыл наукон-культурон центр»-ы сæрдар Æлборты Иван.
Цæгæраты Эльмирæ
