Кировы районы Кæрдзыны скъолайы æстæм къласы ахуырдзау Моргуаты София фæуæлахиз «Старт в науке-2023» наукон-иртасæн æмæ сфæлдыстадон куыстыты дунеон конкурсы.
Хайад «физикæ-математикæ»-йы архайгæйæ, ирыстойнаг чызг дзы хуыздæр бæрæггæнæнтæ равдыста. «Софияйы куыст баст уыд арæзтадон æрмæджыты физикон миниуджыты иртасынадимæ. Ацы темæйыл Софияимæ иумæ бакуыстам афæдзы æрдæджы дæргъы. Конкурсæн фадæттæ сарæзта Уæрæсейы Æрдзиртасынады академи. Мæскуымæ кæй арвыстам, къамисы уæнгтæ нæ уыцы куыстыл æрныхас кодтой æмæ нæм конкурсы комкоммæ хайы архайыны фæдыл хуынды гæххæтт æрбарвыстой. Мæ ахуырдзау ахæм кадджын ерысы кæй фæуæлахиз, уый мын æхсызгон у», — зæгъы физикæйы ахуыргæнæг Хосроты Жаннæ.
Фиппаинаг: конкурсы кæронбæттæн хай ацыд Мæскуыйы 10-12 апрелы.
Хуасдзауты Алинæ
