Амæй размæ Дзæуджыхъæуы Хетæгкаты Къостайы номыл астæуккаг парчы чи уыд, уыцы чиныгдон раивта Дыгуры районы Къора-Урсдонмæ.
Арт-объект нымад у амынд хъæуы цæрæг Гатеты Иринæйы проектыл. Проект баххæст кæнын бантыст форум «Машук»-ы ист гранты фæрцы. 2019 аз — Хетæгкаты Къостайы райгуырдыл 160 азы куы сæххæст, уæд — уынджы чиныгдон байгом кодтой. Парчы рацарæзты фæстæ парк кæмæй не сфидыдта, уыцы объект йæ авторы райгуырæн хъæумæ раивта.
“Фарон фæззæджы уынджы чиныгдон махмæ кæй æрбынæттон, уымæй райгонд стæм. Хъæуы цæрæг адæм ацы чиныгдонмæ арæх æрбацæуынц. Иринæйы зæрды ис гранты хардзæй ноджыдæр ма иу проект райгуырæн хъæуы баххæст кæнын. Ныхас цæуы футболон фæзыл”, — загъта хъæуы сæргълæууæг Гулаты Ремæ.
Нæ уацхæссæг
