12-13 июлы Дзӕуджыхъӕуы йӕ куыст кӕндзӕн дзыллон информацийы фӕрӕзты минӕвӕртты медиафорум «PRO Кавказ».
Зындгонд куыд у, афтӕмӕй журналистты, блогерты, PR-специалистты, медиаэкспертты ахӕм уӕрӕх ӕмбырд Цӕгат Ирыстоны сӕйраг горӕты ныр арӕзт ӕрцӕудзӕн дыккӕгӕм хатт. Форумӕн бындур ӕвӕрд ӕрцыд 2022 азы РЦИ-Аланийы Сӕргълӕууӕг Сергей Меняйлойы хъӕппӕрисӕй.
Фыццаг форум зӕрдӕмӕдзӕугӕ рауад, хъӕздыг уыд алыхуызон цымыдисаг фембӕлдтытӕй. Йӕ архайджытӕн фадат уыд нырыккондӕр информацион технологитимӕ базонгӕ уӕвынӕн, алы регионты дзыллон хабархӕссӕг фӕрӕзты минӕвӕртты фӕлтӕрддзинадӕн аргъ скӕнынӕн ӕмӕ афтӕ дарддӕр.
Фароны форумы бӕрӕггӕнӕнтыл ӕнцой кӕнгӕйӕ, ацы азы организацион комитет бацархайдта, цӕмӕй йӕ программӕ рауайа ноджы хъӕздыгдӕр ӕмӕ мидисджындӕр. Уыдзӕн дзы алыхуызон ахуырадон семинартӕ, лекторитӕ, «цӕлхӕмбырдтӕ», презентацитӕ…
Ныридӕгӕн куыд сбӕрӕг, афтӕмӕй Цӕгат Кавказы регионтӕй уӕлдай, фембӕлды архайдзысты Мӕскуыйы, Дард Хурыскӕсӕн ӕмӕ ӕндӕр уӕрӕсейаг регионты минӕвӕрттӕ. Уыдонӕй уӕлдай форуммӕ саккаг кӕндзысты Хуссар Ирыстоны, Сомихы, Белорусси ӕмӕ ӕндӕр бӕстӕты дзыллон информацийы фӕрӕзты кусджытӕ дӕр.
Уыимӕ, форумы архайыны тыххӕй Дзӕуджыхъӕумӕ ссӕудзысты федералон телеканалтӕ ӕмӕ газетты минӕвӕрттӕ дӕр. Уыдоны нымӕцы — Паддзахадон Думӕйы депутат, зындгонд журналист Евгений Попов, медиаэксперттӕ Иван Сухов, Николай Яковлев, телеамонӕг Александр Смол ӕмӕ иннӕтӕ.
Ацы азы форумы сӕйрагдӕр темӕ уыдзӕн ахӕм: «Медиатыгъдад: мӕнг хабӕрттӕ ӕмӕ ӕцӕгдзинад. Информацион политикӕйы сӕйрагдӕр бындуртӕ».
Сланты Аслан
