Бындур — фидæны наукон æнтыстдзинæдтæн

0
19

РЦИ-Аланийы Сæргълæууæг Сергей Меняйло архайдта Уæрæсейы наукæты академийы Дзæуджыхъæуы наукон центры иугонд наукон советы кадджын æмбырды. Мадзал арæзт уыд Уæрæсейы наукæты академийы 300 азы боны кадæн.

Арфæйы ныхæстæ зæгъгæйæ, Сергей Меняйло бафиппайдта, абоны уавæрты, нæ бæстæ экономикон æгъдауæй æлхъывд куы цæуы, уæд наукæйæ размæцыд ноджы кæй фæхъомысджындæр. Иртасæнты руаджы гом кæнынц ног здæхттæ, продукцийы алы хуызтæ.
— Ивддзинæдтæ æмæ ногæй рацарæзтыты дуджы кæй цæрæм, уымæй амондджын стæм. Уыдон бындур æвæрынц нæ размæцыдæн. Махмæ гыццыл нæй, сæ нæмттæ сыгъзæрин дамгъæтæй уырыссаг наукæйы фыст кæмæн æрцыдысты, ахæм зындгонд адæм. Уыдон егъау бавæрд бахастой наукæйы алы къабазмæ — техникон, æрдзон, гуманитаронмæ. Ис нæм, кæй бафæзмæм, ахæм ахуыргæндтæ, фидæнмæ ныфсджынæй кæсæм, абон та бындур æвæрæм нæ дарддæры наукон æнтыстдзинæдтæн, — фæбæрæг кодта Цæгат Ирыстоны Сæргълæууæг.
Сергей Меняйло бузныджы ныхæстæ загъта ахуыргæндтæ æмæ ацы къабазы ветерантæн сæ бæрзонд профессионализм æмæ удуæлдай фæллойы тыххæй.
Уый фæстæ Цæгат Ирыстоны Сæргълæууæджы арфæйы фыстæджытæ сæ намысджын наукон-иртасæн куысты бæрзонд бæрæггæнæнты тыххæй лæвæрд æрцыдысты Дзæуджыхъæуы наукон центры кусджытæ:
— географион наукæты кандидат Бурдзиуты Ольгæйæн,
— медицинон наукæты кандидат Дзампаты Жаннæйæн,
— физикон-математикон наукæты кандидат Къусраты Зæлинæйæн.
Цæгатирыстойнаг ахуыргæндтæн арфæ ракодтой РЦИ-Аланийы Парламенты Сæрдар Тускъаты Таймураз æмæ ахуырад æмæ наукæйы министр Алыбегты Эллæ дæр.
Æмбырды архайджытæ байхъуыстой Уæрæсейы наукæты академийы Дзæуджыхъæуы наукон центры 2023 азы наукон иртасæнты бæрæггæнæнтæм æмæ ацы аз сæ размæ æвæрд хæсты тыххæй докладмæ.
Куыд фæбæрæг кодтой доклады, уымæ гæсгæ фарон наукон центр æнæхъæнæй дæр сæххæст кодта 26 уæрæхгонд наукон темæйы иртасæнтæ, архайдтой сыл уагдоны 243 кусæджы. Сæ бæрзонд æмвæзад, рæстæджы домæнтæн дзуапп кæй дæдтынц æмæ практикон æгъдауæй пайда кæй сты, уый зыны Уæрæсейы наукæты академийы экспертон хатдзæгты.
Абон республикæйы наукон æмбалад иртасæнтæ аразы алыхуызон къабæзты — зæххы тыххæй наукæйы, математикæ, биомедицинæ, хъæууон хæдзарад, гуманитарон наукæты.

Гапбаты Алетæ

ОСТАВЬТЕ ОТВЕТ

Please enter your comment!
Please enter your name here