Æркастысты «Культурæ»-йы закъонмæ

0
24

РЦИ-Аланийы Национ наукон чиныгдоны цы æмбырд сарæзтой, уым ныхас цыд, Республикæ Цæгат Ирыстон-Аланийы закъон «Культурæ» регионы куыд æххæстгонд цæуы, ууыл. Архайдтой дзы РЦИ-Аланийы Парламенты Сæрдар Тускъаты Таймураз, наукæ, ахуырад, культурæ æмæ информацион политикæйы комитеты сæрдар Еленæ КнЯзева, культурæйы министр Фидараты Сослан, чиныгдæтты, музейты, театрты æмæ æндæр культурон уагдæтты директортæ æмæ аивадон разамонджытæ.

Парламенты Сæрдар Тускъаты Таймураз, æмбырд байгом кæнгæйæ, фæбæрæг кодта паддзахадон культурон политикæйы нысантæ республикæйы:
— Арæхдæр нæ æмбæлын хъæуы ахæм бынæтты æмæ дзурын нæ царды ахсджиаг фарстатыл, адæймаг адæймаг цæмæй у, раст фæндагыл æй цы аразы, хорз хъуыддæгтæм æй цы разæнгард кæны æмæ афтæ дарддæр. Культурæ у ахæм къабаз, адæймаджы хуыздæр миниуджытæн бындур чи æвæры, — загъта Парламенты Сæрдар.
Фидараты Сослан йæ раныхасы радзырдта йæ ведомствæйы куысты тыххæй, 2023 азы сæ къухы цы зынгæ æнтыстдзинæдтæ бафтыд æмæ сæм фидæнмæ цавæр нысантæ ис, уый тыххæй.
— Регионалон проект «Культурон алфамбылай»-мæ гæсгæ республикæйы арæзт æмæ бындуронæй цалцæггонд æрцыдысты 20 Культурæйы хæдзары.
Регионалон проект «Нымæцон культурæ»-йы фæлгæты Нымæцон платформæйы бындурыл нæ республикæйы æртæ музейы фæзынд электрон экскурситæ аразыны мадзæлттæ.
Ноджы ма, министры ныхасмæ гæсгæ, 2021 азæй республикæйы æххæстгонд цæуы «Пушкинаг картæ»-йы программæ. Уыцы паддзахадон программæйы нысан у фæсивæдæн культурон хæзнатæ бауарзын кæнын. 2023 азы программæ «Пушкинаг картæ»-йæ пайда кæнæн ис æппæт паддзахадон æмæ муниципалон театрты, республикæйы музейты æмæ сæ хайæдты, кинотеатрты. Йæ æнæниздзинад хъыгдард кæмæн у, уыцы адæмæн æхсæнады культурон царды архайынæн арæзт цæуынц алыхуызон фадæттæ. Культурæйы министрад «РЦИ-Аланийы Национ наукон чиныгдон»-йы сарæзта сфæлдыстадон лаборатори.
Уымæй дарддæр ма культурæйы министр фæбæрæг кодта, 2023 азы цы зынгæ мадзæлттæ арæзт æрцыд, уыдон: ирон «Нартиадæ»-йы фæлгæты ацыд Дунеон фольклорон фестиваль «Арфæ».
Архайджытæ, æнæмæнг, сæ зæрдыл бадардзысты, Цæгат Ирыстоны хæххон хъæутæм цы цыппар фольклорон-этнографион экспедицийы арæзт æрцыд, уыдон (материалон чи нæу, ахæм культурон хæзнатæ бахъахъхъæнынæн).
Æмбырды ма ныхас цыд, культурæйы къабазы ныртæккæ цы райхалинаг фарстатæ ис, уыдоныл æмæ йæ дарддæры рæзты фарстатыл. Архайджытæ загътой сæ хъуыдытæ нæ республикæйы культурон царды уавæр фæхуыздæр кæнынæн.
Ацы æмбырдæн цы ахсджиаг нысаниуæг ис, уый фæахъаз уыдзæн иумæйагæй, культурæйы размæ цы фарстатæ лæууы, уыдон хынцынæн æмæ регионы культурон бынтæ бахъахъхæныны хъуыддагæн.

Гæбуаты Галинæ

ОСТАВЬТЕ ОТВЕТ

Please enter your comment!
Please enter your name here