Цæгат Ирыстоны Рахизфарсы районы хъæутæй иу — Раздзогыл ацы аз сæххæст 185 азы. Бæрæгбон ацыд хъæуы скъолайы бæстыхайы. Районы администраци æмæ Сылгоймæгты совет, йæ сæргъы Тараты Людмилæ, цы кадджын мадзал бацæттæ кодтой, уырдæм хуынд æрцыдысты Рахизфарсы районы сæргълæууæг Фрайты Сослан, республикон Парламенты депутат Гуытъиаты Вячеслав, нæ республикæйы пысылмон дины управленийы сæрдар Гуæцæлты Хадзымурат, немыцаг национ-культурон æхсæнад «Возрождение»-йы сæрдар Роберт Айзверт, Бæтæхъойыхъæуы Сыгъдæг Георгийы аргъуаны сауджын Лазар æмæ районы иннæ хъæуты минæвæрттæ.
Бæрæгбоны кадджын уазджытæ ма уыдысты, сæрмагонд æфсæддон операцийы чи архайы, уыцы хъæбатырты ныййарджытæ, хъæуы цæрджытæ: ахуырады ветерантæ, культурæ, медицинæ æмæ, царды иннæ ахсджиаг къабæзтæн йæ цард чи снывонд кодта, уыдон. Раздæры хъæуы хицау Дзодзиаты Чермен æмæ ныры хъæуы администрацийы сæрдар Гусаты Хъазыбег.
Бæрæгбон амыдта РЦИ-Аланийы культурæйы сгуыхт кусæг Лалыты Хъазыбег. Уазджытæн арфæ ракодта Рахизфарсы районы разамонæг Фрайты Сослан æмæ загъта:
— Емаусæн цы кадджын истори ис, уый, фыццаджыдæр, йæ цæрджыты фæрцы у. Ацы гыццыл хъæуæй Фыдыбæстæйы Стыр хæстмæ ацыдысты 308 адæймаджы. Сæ фылдæр нал æрыздæхтысты сæ хæдзæрттæм, сæ райгуырæн хъæубæстæм. Абон дæр уыдоны кæстæртæ кадимæ æххæст кæнынц сæ хæстæ. Æрыгон фæсивæдæй бирæтæ архайынц сæрмагонд æфсæддон операцийы Украинæйы зæххыл. Мæн фæнды раарфæ кæнын уе ‘ппæтæн дæр бæрæгбоны фæдыл, фыццаджыдæр та ныййарджытæн. Сымах хъомыл кæнут хъæбатырты. Алчидæр сæ архайы нæ иумæйаг Уæлахизыл, нæ бæстæ бахъахъхъæныныл, æмæ сæ къухы тагъд рæстæджы куыд бафта, сæ хæдзæрттæм дзæбæхæй, сæрæгасæй куыд æрыздæхой, ахæм арфæ нæ уæд!
Уазджытæн фадат уыд Раздзоджы хъæуы истори, йæ рагон ном «Эммаус»-ы равзæрд æмæ дзы, цы зындгонд адæм рацыд, уыдон базонынæн.
Бæрæгбон сæ аивадæй срæсугъд кодтой районы музыкалон скъолайы хоры архайджытæ, сæ разамонæг — Виктория Пархоменко. Парламент æмæ хъæуы сæрдары уазджытæн лæвæрд æрцыдысты Кады гæххæттытæ, дидинджытæ æмæ зæрдылдарæн лæвæрттæ. Районы администраци Раздзоджы скъолайæн балæвар кодта æвдай мин сомы аргъ фæлмæн бандæттæ.
Гæбуаты Галинæ,
авторы ист къамтæ
