Цæгат Ирыстоны паддзахадон базарадон-экономикон колледжы кадджын уавæры байгом профессион дæсныдзинады чемпионаты регионалон къæпхæн. Уым хицæн цатырты сæ дæсныйад равдыстой нæ республикæйы профессион ахуырады колледжтæ.
Уыдонимæ — Цæгат Ирыстоны медицинон колледж, Дзæуджыхъæуы 5-æм профессион училищæ, Цæгат Ирыстоны педагогон колледж æмæ иннæтæ. Уыдонæй дарддæр, æрбацæуæг адæмы сæ продукциимæ базонгæ кодтой акционерон æхсæнадтæ «Бавари», «Дельта», «Омега», «Колос», «Вершина», супермаркеттæ «Стейтон», «Наш» æмæ иннæтæ.
Профессион дæсныдзинады чемпионаты регионалон къæпхæны архайджытæ æмæ сæ продукциимæ базонгæ сты РЦИ-Аланийы Сæргълæууæг Сергей Меняйло, Хицауады Сæрдары хæдивæг Платы Альбинæ, ахуырад æмæ наукæйы министр Алыбегты Эллæ. Уыдон бабæрæг кодтой алы цатыр дæр.
Кæд къæвда æппындæр не ’рынцад, уæддæр нæ бахъыгдардта чемпионаты архайджыты. Базарадон-экономикон колледжы студентты кафджыты коллектив йæ аивадæй срæсугъд кодта ацы мадзал. Æрбацæуæг адæм разыйæ баззадысты чемпионаты архайджыты цæттæдзинадæй.
Гæбуаты Галинæ
