Цæгат Ирыстоны кусынц авд ахуырадон-куыстадон комплексы.
Фаронæй нырмæ республикæйы колледжты парахатæй æвзæрынц ахуырадон-куыстадон комплекстæ.
Товартæ кæм уадзынц æмæ лæггæдтæ кæм æххæст кæнынц, ацы комплекстæ æцæг уагæй нымад сты ахæм чысыл куыстуæттыл. Ахуырад æмæ
куыст иу кæнгæйæ, амынд комплексты фæрцы фæсивæд хæрзхъæд практикон ахуырад ацæуынц, стæй мызд дæр райсынц. Сæйрагдæр та уый у, æмæ диплом райсыны рæстæг колледжтæ кастфæуæвæг лæппутæ æмæ чызджыты фæллойадон чиныджы уыдзæн кусæн бынаты тыххæй фыццаг фыст.
Зæгъæм, Дзæуджыхъæуы 4-æм профессион лицейы студенттæ иттæг дæсны уагæй хуыйынц кусджытæн сæрмагонд уæлæдарæс, шторæтæ, хуыссæнгæрзтæ æмæ ма суанг сценикон фæлыстытæ дæр.
Дзæуджыхъæуы бирæкъабазджын техникумы ахуырдзау-лæппутæ дæр æвзыгъддзинадæй чызджыты æййафынц. Ахуыргæнæндоны студенттæ хъæдæрмæгæй хæдзары дзаумæттæ, пластикон рудзгуытæ æмæ æндæртæ саразыны фæдыл фæдзæхстытæ арæх райсынц. Ныридæгæн студенттæ милуангай сомты аргъ фæдзæхстытæ сæххæст кодтой.
Ахуыры рæстæг студенттæн æхца бакусыны фадат кæй ис, уый фæсивæды разæнгард кæны нывыл ахуыр кæнынмæ. Амынд комплексты хæс у куыстуæттæн дæсны специалистты бацæттæ кæнын.
(«ИрИнформ»)
