Республикæйы Сæргълæууæг Сергей МЕНЯЙЛО фембæлд патриотон клуб «Райгуырæн бæстæ»-йы æвзонг хъомылгæнинæгтимæ. Фембæлды архайдтой скъолаты кæстæр кълæсты ахуырдзаутæ, интеллектуалон конкурсты уæлахиздзаутæ. Клубæн разамынд дæтты Хъарданты Тимур.
Раздæр уал сывæллæттæ бакастысты æмдзæвгæтæ ирон, цæцæйнаг, тæтæйрæг, авайраг æвзæгтыл. Сæ уæлæ уыд сæ национ уæлæдарæс. Республикæйы разамонæг бузныг загъта ныййарджытæн, национ традицитæн кад кæнгæйæ, сæ сабиты кæй хъомыл кæнынц, уый тыххæй.
Сергей Меняйло куыд фæбæрæг кодта, афтæмæй ахсджиаг у фыды- зæхмæ уарзондзинад, адæмты ‘хсæн хæлардзинад, мадæлон æвзаг, æгъдау æмæ культурæ зонын. Дзуаппытæ радта сывæллæтты фарстытæн.
«Мах фембæлдыстæм бæрæгбоны агъоммæ, 9 май у Уæлахизы бон. Сымах рæзут уæ уарзон бæстæйы, адæм дзы хæларæй, кæрæдзи æмбаргæйæ цæрынц, сæ бон у сæ мадæлон æвзагыл дзурын, сæ национ уæлæдарæс дарын. Уæрæсейы цæрынц тынг бирæ адæмыхæттытæ, нæ республикæйы сты 100-йæ фылдæр. Нæ бæстæйы Президент Владимир Путин куыд фæзæгъы, афтæмæй Уæрæсе хъæздыг у йæ бирæнациондзинадæй. Раст у йæ ныхас. Нæ тых уый мидæг ис. Кæрæдзиимæ кæй æмбæлут, кæрæдзи кæй æмбарут, хæларæй кæй цæрут, уый мын æхсызгон у. Нæ бæстæ афтæмæй размæ цæудзæн», – загъта Сергей Меняйло.
Нæ уацхæссæг
