РЦИ-Аланийы Сæргълæууæг Сергей Меняйло республикæйы Хицауады уæнгтæ æмæ муниципалитетты разамонджытæн цы уæрæх æмбырд сарæзта, уым бæстон ныхас рауад регионы æрвылбоны царды фарстатыл, йæ дарддæры социалон-экономикон размæцыдыл, стæй, УФ-йы Президент Владимир Путин хæстæгдæр 6 азæн бæстæйы райрæзты сæраппонд цы ног уынаффæтæ сфидар кодта, уыдон æххæст кæныныл.
Ныхасы райдайæны министртæ æмæ районты сæргълæуджытæ дзуаппон докладтæ скодтой, амæй размæ æмбырдты республикæйы разамындæй цы оперативон хæслæвæрдтæ райстой, уыдон куыд æххæстгонд цæуынц, уый фæдыл. Сæрмагонд æргом аздæхтæуыд ахсджиаг инвестицион проекттæ æмæ социалон программæтæ нысангонд æмгъуыдты цардмæ уадзыны фарстамæ.
Ведомствæтæ æмæ муниципалитетты разамонджыты дзуаппытæн хатдзæгтæ кæнгæйæ, Сергей Меняйло бæлвырд амынддзинæдтæ радта Цæрæнуатон-коммуналон хæдзарады, артаг æмæ энергетикæйы министрад æмæ районты сæргълæуджытæн, цæмæй, боныхъæды æууæлтæ хынцгæйæ, социалон кусæндæттæ æмæ цæрæнуæтты хъармдæттæнтæ цыбыр рæстæгмæ ногæй скусын кæной. Уымæй уæлдай, профилон ведомствæты минæвæрттæ бакусдзысты Алагиры районы хъармдæттæнты куыст банывыл кæныны ног проектыл. Уыимæ, æппæт министрадтæ æмæ ведомствæты кусджытæн дæр амынд æрцыд, цæмæй, сæ бæрны цы вазыгджын социалон объекттæ ис, уыдоны арæзтад æмæ цалцæджы фæдыл 2024 азæн хъæугæ проектон-сметон документаци афойнадыл бацæттæ кæной æмæ æмбæлгæ бадзырдтæ бафыссой подрядон организацитимæ.
Дæрддæр республикæйы разамонæг æрлæууыд, 2024 азы 7 майы Президент Владимир Путин хæстæгдæр 6 азы æмæ 2036 азы онг æмгъуыдмæ бæстæйы дарддæры райрæзты сæраппонд цы ног уынаффæтæ сфидар кодта, уыдоныл. Президенты Указы бæлвырд бæрæггонд æрцыдысты Уæрæсейы фидæны æнæкъуыхцы размæцыды ахсджиагдæр стратегион нысантæ. Уыдоны нымæцы: уæрæсейæгты æнæниздзинад æмæ царды фæрныгад фидардæр кæнын, сывæллонджын бинонтæн уæлæмхасæн паддзахадон æххуыс, экологон æгъдауæй æдас алфамбылай, хъомысджын æмæ технологон æгъдауæй размæцыд экономикæ, паддзахадон æмæ муниципалон разамынды модернизаци æмæ афтæ дарддæр. Уыцы нысантæ царды рауадзынæн ныртæккæ цæттæгонд цæуынц ног национ проекттæ.
– Цæгат Ирыстоны Хицауадæн хæс кæнын, цæмæй уæлдæр амынд проектты республикæ æппæтвæрсыгæй архайа. Уыцы нысанæн та рагагъоммæ сбæлвырд кæнут, Президенты Указы цы стратегион хæслæвæрдтæ ис, уыдоны фæткы бындурыл республикæйы цавæр уæлæмхасæн социалон-экономикон мадзæлттæ саразын хъæуы, уый. Уыдон сбæлдвырд кæныны фæстæ та æнгом бакусут профилон федералон ведомствæтимæ, цæмæй республикæйы уавæр ног проектты фæрцы зынгæ фæфидардæр уа. Иу ныхасæй, нæ абоны хъæппæрисджын æмæ бæстон архайдæй аразгæ уыдзæн хæстæгдæр фидæны куыс-
тыты нывылад æмæ æнтысындзинад, – бацамыдта Сергей Меняйло.
Сланты Аслан
