РЦИ-Аланийы Хицауады Сæрдар Дзанайты Барисы разамындæй уыд нæ республикæйы Хицауады æмбырд. Ныхас цыдис Цæгат Ирыстоны социалон-экономикон фарстатыл, иуæй-иу закъонты проекттæм ивддзинæдтæ бахæссыны фæдыл.
Æмбырд райдыдта кадрты фарстайæ. Къуымæллæггаты Олег Андрейы фырт нысангонд æрцыд РЦИ-Аланийы национ политикæ æмæ æддагон бастдзинæдты министры хæдивæгæй. Дзанайты Барис куыд загъта, афтæмæй Къуымæллæггаты Олег ацы куысты йæхи равдыста иттæг хорз специалистæй.
Хицауады Сæрдары хæдивæг Отарты Георги радзырдта «Херсоны облæс-тæй республикæйы фæз-уатмæ æрбалидзæг адæмæн æххуысы мадзæлтты тыххæй» закъоны проектмæ ивддзинæдтæ бахæссыны фæдыл. Отары-фырт куыд загъта, афтæмæй, Херсонæй Цæгат Ирыстонмæ чи æрбалыгъд, уыдонæн дæтдзысты иурæстæгон фиддонтæй æххуыс цæрæн хæдзæрттæ самал кæнынæн.
Нæ республикæйы граждæнтæн лæвар медицинон æххуыстæ кæныны мадзæлттæн бахъæудзæн уæлæмхасæн финансон хæрдзтæ. Уый тыххæй та æмбырды архайджытæн фехъусын кодта РЦИ-Аланийы æнæниздзинад хъахъхъæнынады министр Тебиаты
Сослан. Уый фæнысан кодта, уыцы æхцайы фæрæзтæ хардзгонд кæй цæудзысты паддзахадон программæйы бындурыл нæ республикæйы медицинон куыстуæттæн хъæугæ ифтонггæрзтæ æмæ льготон хостæ самал кæнынæн. Уымæй уæлдай, Тебиаты Сослан радзырдта медицинон организацитæ донорон тугæй лæвар ифтонг кæныны мадзæлтты тыххæй дæр.
РЦИ-Аланийы культурæйы къабазы рæзты нысантыл дзырдта нæ республикæйы культурæйы министры хæдивæг Рæмонты Маринæ. Уымæй уæлдай, фæнысан кодта, ацы аз Хетæгкаты Къостайы райгуырды 165 азы бонмæ, саразын кæй хъæуы организацион комитет тыхы структурæты уæнгтæ æмæ наукæйы къабазы минæвæрттæй.
Хицауады æмбырды æркастысты фермерон хæ-дзарæдты куысты æххуысæн гранттæ дæттыны уагмæ æмæ хъæууон кооперацийы рæзтмæ ивддзинæдтæ бахæссыны тыххæй закъоны проектмæ. Уый тыххæй ра-дзырдта РЦИ-Аланийы хъæууон хæдзарады министры хæдивæг Къадзаты Игорь. Куыд загъта, афтæмæй ацы аз гранттæ дæттыны уаг уыдзæн электронон ма-дзалы хуызы. Ахæм фæткыл æвзæрст цæудзысты, субсидитæ райсыны фæдыл йæ гæххæттытæ чи бадæтта, уыцы фермертæ. Дыууæ азмæ гранттæ 340 милуан сомы аргъ райстой 50 фермерон хæдзарады æмæ кооператоры.
Æмбырды кæрон Дзанайты Барис бæлвырд бæрæггæнæнтæ загъта, ивгъуыд 2023 азы паддзахадон программæтæ æмæ национ проектты фæлгæты нæ республикæйы тынг бирæ хъуыддæгтæ æххæстгонд кæй æрцыдис, уыдонæй æнæниздзинад хъахъхъæныны къабазы арæзт æмæ цалцæггонд цыдысты амбулаторитæ, поликлиникæтæ. Уымæй уæлдай, фылдæр цæстдард цыдис нæ рес-публикæйы хъæууон хæдзарады къабазмæ дæр.
Æмбырды ныхас цыдис ивгъуыд азы республикæйы бюджеты хæрдзтыл дæр. Дзуаппон доклад бацæттæ кодта РЦИ-Аланийы финансты министры хæдивæг Оксанæ Карова.
Саутæты Тамилæ
