Рагон æгъдаумæ гæсгæ, Уæлахизы боны агъоммæ Алагиры районы мидхъуыддæгты хайады кусджытæ Фыдыбæстæйы Стыр хæсты архайджытæн раарфæ кодтой.
Хайады хицауы хæдивджытæ, мидбæстон службæйы дæлбулкъонтæ Хъайтмазты Аслан æмæ Ольгæ Чередниченко, Ветеранты советы сæрдар, пъæлицæйы отставкæйы булкъон Бицъоты Олег æмæ хайады иннæ кусджытæ бабæрæг кодтой хæсты ветерантæ Хæдарцаты Мурат æмæ Алексей Шевченкойы.
Афæдзæй-афæдзмæ æвирхъау цауты æвдисæнты нымæц къаддæр кæй кæны, уый хынцгæйæ, Фыдыбæстæйы Стыр хæсты архайджытимæ алы фембæлд дæр банымайæн ис нæ Райгуырæн бæстæйы рагон цардимæ фембæлдыл. Пъагонджын уазджытæ хæсты ветерантæн, цæстуарзон арфæтæ сын ракæнгæйæ, зæрдылдарæн лæвæрттæ радтой.
Барадхъахъхъæнджытимæ фембæлды рæстæг хæсты ветерантæ се ’фсæддон службæйы тыххæй мысинæгтæ, стæй сæ ныры уавæры тыххæй хабæрттæ радзырдтой. Фембæлдтыты кæрон хæсты архайджытæ уазджытæн лæвæртты тыххæй бузныг загътой æмæ Уæлахизы бæрæгбоны ахадындзинад бафиппайдтой.
Гæззаты Зæринæ,
Алагиры районы мидхъуыддæгты
хайады инспектор
