Республикæ Цæгат Ирыстон-Алани æхсызгонæй сæмбæлд Цытджын Уæлахизы 79 азы æмæ Ирыстон Уæрæсеимæ баиуы 250 азы кадæн арæзт Кæдетты æппæтуæрæсеон хæстон-патриотон 19-æм слеты архайджытыл.
Нæ республикæмæ ссыдысты 146 лæппу æмæ чызджы РФ-йы фараст регионæй: горæт Елизово — Камчаткæйы крайæ, Кунгур — Пермы крайæ, Октябрыхъæу — Оренбурджы облæстæй, Североморск — Мурманскы областæй, Солнечногорск — Мæскуыйы областæй, Тамбовæй, Хулимсунты хъæу — Ханты-Мансийскы автономон зылдæй, горæт Кировæй. Нæ республикæйы кад та хъахъхъæдтой Цæлыччы скъолайы кадеттæ.
Сæ программæ уыд тынг хъæздыг, къуырийы дæргъы архайдтой алыхуызон цымыдисаг мадзæлтты. Иу бон сæрмагондæй æрцыдысты Цæлыкмæ æмæ ам сæ хъарутæ æвзæрстой спорты алы хуызтæй: ГТО-йы нормæтæ дæттынæй, мини-футболæй, рæнхъыстады цæттæдзинадæй, хæстон-спортивон хъæзтытæй.
Цæлыччы скъолайы бирæ азты дæргъы ис кадетон кълæстæ, иу æмæ дыууæ хатты нæ архайдтой Уæрæсейы алы рæтты ерысты æмæ æнæ хæрзиуæгæй Ирыстонмæ никæд ссы-дысты. Ныр дæр та æппæт хъарутæй бацархайдтой, æмæ сæ командæ бацахста дыккаг бынат. Хорзæхджын æрцыдысты кубок æмæ Кады гæххæттæй.
ГАПБАТЫ Алетæ
