Дæ фæстæ адæмы ‘хсæн цы фæд ныууадзай, уымæй бæрæг дардзынæ. Суанг дæ амæлæты фæстæ дæр дæ ном рох нæ уыдзæн, дæ фæллæйттæ, дæ архайд баззайдзысты дзыллæты зæрдæты. Афтæ рауад Социалистон Фæллойы Хъæбатыр Битарты Евгены хъысмæт дæр.
Кæд æмæ кæд ахицæн йæ цардæй, фæлæ йын йæ рæстаг фыдæбæттæ абон дæр нæ рох кæнынц йæ хиуæттæ, хорз æй чи зыдта, уыдоны фæдонтæ.
Номдзыд педагогы ном сæнусон кæныныл бацархайдтой Алагиры районы разамынд, хъæппæрис равдыста районы сæргълæууæг Дзантиаты Ислам, уæдæ йæ цуры балæууыдысты Битарты мыггаг дæр. Битарты Евген райгуырд Садоны, каст фæцис Кутаисы ахуыргæнджыты семинари. Кусын райдыдта Беслæны аргъуаны-зылды скъолайы.
Не ‘вгъау кодта йæ зонындзинæдтæ, уайтагъд-иу сабиты зæрдæтæм ссардта фæндаг. Йæ уроктæм ын бæллыдысты, тырныдтой скъоламæ сывæллæттæ. Фæлæ Битарты Евгены зæрдæ æхсайдта Алагиры скъоламæ, уый уым уыдис иунæг. Алагирæгты дæр тынг фæндыд ахуырад райсын. Афтæ зæгъæн ис, æмæ Битары-фырт йæ цард снывонд кодта уыцы скъолайæн, уæды ахуырдзаутæн.
Иу фæлтæр иннæйы раивы, иу фæлтæр иннæмæн радзуры Битарты Евгены удуæлдай фæллойы тыххæй. Афтæмæй цæры адæмы зæрдæты. Ныр та Алагиры горæты, Намысы аллейы, фæзынд Социалистон Фæллойы Хъæбатыр Битарты Евгены бюст.
Нæ уацхæссæг
