Цæгат Ирыстоны дарддæр æххæстгонд цæуынц фыццаградон национ проект «Æнæниздзинад хъахъхъæнынад»-ы уагæвæрдтæ. Уый фæрцы зынгæ ивддзинæдтæ цæуы медицинон кусæндæтты рацарæзт æмæ техникон ифтонгдзинады хъуыддаджы.
РЦИ-Аланийы Æнæниздзинад хъахъхъæнынады министрады пресс-службæйы «Рæстдзинад»-æн куыд радзырдтой, афтæмæй, национ проектыл кусгæйæ, сæрмагонд æргом здæхт цæуы медицинæйы фыццаг къæпхæны (поликлиникæтæ, амбулаторитæ æмæ фелсырон-акушерон пунктты) уавæрмæ. Комкоммæ уыцы нысанæн арæзт æрцыд амынд национ проекты дæлпрограммæ «Æнæниздзинад хъахъхъæнынады системæйы фыццаг къæпхæны кусæндæтты модернизаци».
Уыцы программæйы фæрцы Дзæуджыхъæу æмæ республикæйы районты цалцæггонд цæуынц поликлиникæтæ, хъæуты та аразынц ног фелсырон-акушерон пункттæ, уыцы иу рæстæг лыггонд цæуынц хъæугæ специалисттæ æмæ нырыккон техникæйæ ифтонгдзинады фарстатæ дæр.
Зæгъæм, ныртæккæ рацарæзты куыстытæ кæм кæнынц, уыцы уагдæттæй иу у Дзæуджыхъæуы сывæллæтты 3-æм поликлиникæ.
Подрядон организацийы бригадтæ уæхскуæзæй бавнæлдтой сæ куыстмæ. Цыбыр æмгъуыдмæ бæстыхайы уæладзгуытæ асыгъдæг кодтой зæронд дуæрттæ æмæ рудзгуытæй, ивинаг ифтонггæрзтæ æмæ хæтæлтæй. Æмæ афойнадыл бавнæлдтой бæстыхайы мидæггаг змæлдтытæм – электрон тыхдæттæн æмæ иннæ коммуникацитæ кæм раивтой, уыцы бынæтты сæ тæмæны сты къулсæрдæн æмæ æндæр аивгæнæн куыстытæ… Цалцæджы пъланмæ гæсгæ, ногтæй раивдзысты рудзгуытæ, дуæрттæ, пъолтæ, æппæт инженерон хæтæлтæ, ныридæгæн бавнæлдтой зынгсирвæзтæй æдасдзинады сигнализаци æвæрынмæ дæр. Цалцæггæнджыты иу хай архайы бæстыхайы æддаг фæлгонцадон куыстыты. Агъуысты сæр уал раивтой. Поликлиникæйы сæвæрдзысты ног лифттæ дæр…
Бындурон цалцæджы куыстыты фæтк æмæ хæрзхъæддзинадмæ цæстдард ис Æнæниздзинад хъахъхъæнынад æмæ иннæ профилон ведомствæты ‘рдыгæй.
Дæлпрограммæ «Æнæниздзинад хъахъхъæнынады системæйы фыццаг къæпхæны кусæндæтты модернизаци» æххæстгонд цæуы 2022 азæй фæстæмæ. Йæ сæйрагдæр нысан у адæмæн сæ цæрæн бынæттæм ‘ввахс рапарахат кæнын медицинон кусæндæтты архайд.
КАЛМАНТЫ Аслан
