Уалдзæг куыддæр йæ хуыз æвдисын райдыдта, афтæ ирон лæджы бинойнаг, кусаг уырыссаг Наталья дæр йæ цæхæрадонмæ рацыд. Уымæ алцыдæр — сагъд: нуры, хъæдындз, алыхуызон хъацæн кæрдæджытæ, суанг æрыскъæфы онг. Йæхи иронау дзурын дæр æлгъитыны онг ахуыр кæны. Сыхбæсты дæр — кадджын, куыд йæхæдæг, афтæ йæ бинонтæ дæр.
Ныр дæр рауайы тагъд-тагъд, йæ бинонтæн сихор æрæвæрдта æмæ ма исты цъæхтæ æрбадавон, зæгъгæ, куыддæр цæхæрадонмæ дуар бакодта, афтæ фырдисæй куыд нæ ахауд. Знон дæр ма цин цы зайæгойтыл кодта, уыдон ныр кæйдæр хуыты амæттаг фесты. Йæ размæ цы уис фæци, уымæй хуыты нæмгæ-нæмгæ фæтæры йæ хъæлæсыдзаг хъæргæнгæ, уæдæ, бинонтæй дæр исчи ацы диссагмæ кæд ракæсид, зæгъгæ.
Йæ хъæрмæ сыхаг лæппу йæхи цæхæрадонмæ рауади. Афарста йæ: «Цы ‘рцыд, Наталья?!» Лæппу хабар куы бамбæрста, уæд багæпп кодта йæ сыхаджы цæхæрадонмæ æмæ, хуытæ кæцæй æрбабырстой, ууылты сæ федте кодтой. Лæппу цалынмæ телæй фидæрттæ кодта, уæдмæ Наталья æлгъитынæй нал æнцади. «Ам, Ирыстоны хуытæ йæ кæртæй æддæмæ чи уадзы, уый йæхæдæг дæр хуы у!» æмæ ма бирæ æндæр карз æлгъыстытæ хауд йæ дзыхæй. Лæппу йæ сабыртæ кæны, цæй, æрзайдзыс-ты та, зæгъгæ, стæй йæ афарс-та, æмæ, дам, Уæрæсейы кæм цардтæ, уым дæр сæ нæ уагътой хуыты æддæмæ? «Уым дæр нозтыл чи фæци, ахæмтæ сæ нæ рауадздзысты, уæртæ кæмдæр хибар, æнæ сыхæгтæй ма цæрæнт, æндæр, зæгъгæ, загъта Наталья, лæппуимæ та йæ ныхас фæуагъта æмæ ногæй æрдиаг кæнын райдыдта: «Мæ куыст мын чи фесæфта, уый мæнæн мард у, æмæ йын хист скæнæнт, хист, йæ хуытæй». Лæппу та йæ сабыртæ кæны æмæ йын дзуры, хуыйæ хист ничи кæны, зæгъгæ… Наталья йæ хъарджытæ фæуагъта æмæ йын афтæ: «Гæнæнтæ ис, гæнæнтæ — хуытæ ауæй кæнæнт, хъуг балхæнæнт æмæ хист скæнæнт!..»
Уæдмæ хæдзары хицау, уæдæ нæ кæрдæджытæ цæй æрæгмæ цæуынц, зæгъгæ, йæ кæстæр лæппуимæ цæхæрадонмæ рацыдысты. Куы базыдтой хабар, уæд хæдзары хицау загъта: «Цы ‘рцыди, уый æрцыди. Уалдзæг нырма ныр райдыдта, æрзайдзæн, нæхæдæг дæр аххосджын стæм. Айфыццаг трактор гутонæй куы бахуым кодта, уæд тагъд-тагъдæй цæхæрадоны кæрон хорз æхгæд не ‘рцыд!»
ТЕТАТЫ Эльврик
