Ис ын æнгом бастдзинад республикæйы цæрджытимæ

0
39

Знон Цæгат Ирыстоны Сæргълæууæг Сергей МЕНЯЙЛО фембæлд дзыллон хабархæссæг фæрæзты минæвæрттимæ æмæ сын сæ фарстытæн бæстон дзуаппытæ ратта. Пресс-конференци сси традицион, цыди æртæ сахатмæ ‘ввахс.
Регионы разамонæг йæ разныхасы загъта, абон нæ бæстæ цы уавæры ис, цавæр хæстæ лæууы æхсæнады размæ уыцы уавæры, радзырдта республикæйы социалон-экономикон рæзты мадзæлтты тыххæй. Пресс-конференцийы тыххæй та республикæйы Сæргълæууæг загъта, æрвылбон æрмæст министрадтæ, ведомствæтæ æмæ службæты разамонджытимæ бастдзинад кæй нæ дары, фæлæ ма кæй кæсы социалон хызтæм дæр æмæ уырдыгæй базоны, адæм цæмæй цæрынц, цы сæ тыхсын кæны, цавæр æнæлыггонд фарстатæ сæм æвзæры. Æппæт уыдæттæ хынцгæйæ, пресс-конференцийы видеобастдзинады руаджы архайдтой министрадтæ, ведомствæтæ æмæ районты разамонджытæ.
Дарддæр мадзалы архайджытæ райдыдтой дæттын сæ фарстытæ.
Фарст: Дзæуджыхъæу æмæ республикæйы цæрджытæй бирæтæ фæрсынц, Доны станцæйы цы бирæуæладзыгон цæрæнуæтты арæзтад райдайынмæ хъавынц, уый тыххæй. Ацы бонмæ арæзтады уавæр куыд у?
Дзуапп: Уыцы арæзтад у инвестицион проект, æмæ уал æм абоны онг æртæ хатты æркастыстæм æмæ йæм ивддзинæдтæ хæссæм. Инвестор цы зæгъы, уымæ хъусæм, фæлæ уынаффæ хаст æрцæудзæн, æрмæстдæр æхсæнадимæ иу хъуыдымæ куы ‘рцæуæм, уæд. Нырма хъуыддаг лыггонд нæма ‘рцыд. Кæй зæгъын æй хъæуы, инвесторы фæнды йæ проекты бындурыл фылдæр æхца бакусын, фæлæ нæ республикæйæн зиан чи ‘рхæсдзæн, ахæм уынаффæ хаст не’ рцæудзæн ацы фарстайы.
Ныртæккæ уал хæрзвадæттæ арæзт цæуы Доны станцæйы фæзуаты, уый у проекты фыццаг къæпхæн. Кæд афтæ фехъусæн ис, проект ист у æмæ ныридæгæн царды уагъд цæуы, зæгъгæ, уæддæр уый раст нæу. Иу хатт дæр ма йæ зæгъын — нæ горæты цæрджыты размæ хаст æрцæудзæн проект, ныхас ыл кæндзыстæм иумæ, æхсæнады фæндонмæ, æнæмæнг, нæ хъус æрдардзыстæм.
Фарст: Æрæджы, Сергей Иваны фырт, загътай, арæзт кæй æрцæудзæн Советон Цæдисы дыууæ хатты æмæ Монголы Адæмон Республикæйы Хъæбатыр Плиты Иссæйы номыл æфсæддон полкъ. Сæрмагонд æфсæддон операцийы архайджытæ æмæ республикæйы цæрджытæ фæрсынц, нæ дыууæ батальоны — «Шторм» æмæ «Алани»-йы бындурыл æй сараздзысты, чи йын дæтдзæн разамынд?
Дзуапп: Нæ намысджын æмзæххон балхонæджы номыл полкъ аразæм ам, Ирыстоны. Сусæггаг нæу, алы регионыл дæр ис хæсæвæрд сæрмагонд æфсæддон операцимæ адæм æрвитыны тыххæй. Нæ лæппутæй бирæтæ контракттæ бафыстой нæхимæ, Ирыстоны нæ, фæлæ æндæр рæтты. Ныртæккæ хæцынц алы рæтты æмæ сæ фæнды, цæмæй сæ «Алани» кæнæ «Шторм»-мæ æрбаивой. Алкæд ахæм фадат нæ вæййы, уымæ гæсгæ, рахастам уынаффæ полкъ саразыны тыххæй, уыдзæн 58-æм æфсады дæлбазыр. Йæ æнæсцух дислокацийы бынат уыдзæн Ирыстоны, Тарскæйы хъæумæ ‘ввахс полигоны сæ ахуыр кæндзысты иу рæстæг. Контракт бафыссыны бар дзы уыдзæн æрмæст Ирыстоны цæрджытæн нæ, фæлæ иннæ регионты минæвæрттæн дæр. Ам сæ сифтонг кæндзыстæм, куыд хæстон дарæсæй, афтæ хæсты быдыры иннæ хъæугæ дзаумæттæй дæр. Гæрзифтонг тыхты разамындимæ фарста лыггонд æрцыд, куыст цæуы хъуыддагыл. Батальон «Алани» уыцы полчъы рæнхъытæм нæ бацæудзæн, «Шторм» та дзы уыдзæн хицæн батальонæй. Полкъæн разамынд чи дæтдзæн, уыцы фарстамæ дæр кæсæм Уæрæсейы Æфсады разамындимæ. Махмæ ис нæхи кандидаттæ командæгæнджыты бынæттæм, лæмбынæг сæм каст цæудзæн. Æфсæддон операци куы фæуа, уæд, хæстонтæй кæй бафæнда, уый баззайдзæн контракты бындурыл службæ кæнгæйæ, иннæтæ та ацæудзысты запасмæ. Уыимæ, æппæт хæстонтæ дæр социалон æгъдауæй уыдзысты хъахъхъæд. Полчъы æнæсцух бынат уыдзæн Мæздæджы.
Фарст: Сергей Иваны фырт, апрелы æмбырдтæй иуы, стæй фæстæдæр дæр карзæй дзырдтай, Алагиры æмæ иннæ районты дæр зæххытæ чи бацахста æнæбындурæй æмæ дзы дачæтæ, хæдзæрттæ чи сарæзта, уыдоны тыххæй. Уыцы хъуыддаджы цавæр куыст цæуы?
Дзуапп: Куыст цæуы æнæсцухæй æмæ дарддæр дæр цæудзæн. Абоны онг уал тæрхондоны ис, æркæсын кæмæ хъæуы, ахæм 800 хъуыддаджы, æмæ сæ нымæц æрвылбон рæзы. Æнæзакъонæй ахст æрцыдысты хæхты фæхстæ, цæугæдæтты былгæрæттæ, сейсмологтæ тæссаг кæй хонынц лæбырдæй, ахæм зæххы хæйттæ. Йæ рæстæджы кадастрацигонд не ‘рцыдысты национ паркты арæнтæ æмæ афтæ дарддæр. Абон æппæт уыдæттæ дзырддаг систы. Зæгъæм, ныртæккæ Алагиры районы хъæутæм дон уадзæм, æмæ, куыд рабæрæг, афтæмæй донгуырæн 49 азмæ арендæйы райста кампани «Осетия Лац», уыимæ йын йæ аргъ рагагъоммæ æппæт уыцы азтæн дæр бафыста. Суткæйы дæргъы дзы 300 кубометры исы дон, зæгъгæ, зæгъы йæ хицауад, фæлæ йæ бæлвырд чи зæгъдзæн, кæд æмæ йын счетчик нæй, уæд? Ныртæккæ ацы фарста закъоны бындурыл ныллыг кæнынмæ хъавæм.
Иннæ ахæм — æнæзакъонæй арæзт амаддзæгтæ Фыййагдон æмæ Ирыстоны иннæ районты. Уыдонæй алкæмæ дæр хицæнæй æркæсдзæн, цы къамис сарæзтам, уый. Ныридæгæн уал республикæйы исбонадмæ раздæхтам къорд зæххы хайы.
Фарст: Не ‘мзæххонтæй иу, сæрмагонд æфсæддон операцийы архайгæйæ, дыууæ хатты фæцæф, фæлæ куы сдзæбæх вæййы, уæд фæстæмæ фронтмæ ацæуы. Фæстаг хатт йæ цæст исгæ рауад, æмæ йын Вишневскийы номыл клиникæйы сæвæрдтой цæсты гагуыйы имплант. Уый йæхионæй къаддæр разынд, уый — иу хъуыддаг, фæлæ ма йын кæрдæгхуыз гагуы сæвæрдтой, кæд йæхи цæстытæ тар морæхуыз уыдысты, уæддæр. Загътой йын, ныртæккæ, дам, нæм æрмæстдæр ахæмтæ ис, дæ бон у, æмæ æндæр амалхъом адæймаджы клиникæйы балхæнай, цавæр дæ хъæуы, ахæм. Йæхæдæг æфсæрмы кæны хъаст кæнынмæ, фæлæ йæ гæххæттытæ сты «Рæстдзинад»-ы редакцийы.
Дзуапп: Хъыгагæн, ныртæккæ бирæ цæф хæстонтæ ис. Гæххæттытæ мæм фæхæццæ кæн, æмæ йын æфсæддон-медицинон академийы баныхас кæндзынæн, йæ хъуыддаг ын, æнæмæнг, сараздзынæн.
Фарст: Беслæны генералон пъланмæ цы объекттæ бахастой, уыдон сарæзтой, баззад ма дзы иу — нывкæнынады скъолайы агъуыст. Куыстытæ урæд æрцыдысты, зæгъынц, кæронмæ ахæццæ кæнынæн, дам, фæрæзтæ нæ фаг кæны.
Дзуапп: Беслæнмæ нæм сæрмагонд цæстæнгас ис, фæлæ фæсауæрцы фонд дæр æнæкæрон нæу, хъыгагæн. Объект, æнæмæнг, кæронмæ арæзт æрцæудзæн фидæны аз — ууыл фидарæй дзырд дæттын.
Фарст: Æрæджы нæ республикæмæ цы æнæтæхæг аппарат æрбатахт, уый цавæр зиан æрхаста республикæйæн, æмæ цы арæзт цæуы уыцы цауы фæстиуджытæ аиуварс кæныны тыххæй?
Дзуапп: Æппындæр ницы зиан æрхаста, фæстиуджытæ йын нæ уыд, фæлæ, цæмæй ахæм фæзындтытæн бынат мауал уа дарддæр, уый тыххæй арæзт æрцыд штаб, уавæрмæ иудадзыг цæст дары, ис æм техникон фæрæзтæ, ифтонггæрзтæ.
Фарст: Ногирæй Михайловскы ‘хсæн хиды арæзтады фæуынмæ адæм тынг æнхъæлмæ кæсынц. Кæдмæ у йе ‘мгъуыд?
Дзуапп: Хид вазыгджын объект кæй у, уый хорз æмбарæм, хæдтулгæскъæрджытæ тыхстдзинæдтæ æвзарынц. 200 милуан сомы йын дихгонд æрцыд, хиды хицæн хæйттæ аразынц Дагестаны, «Росавтодор»-ы разамындимæ баныхас кодтам, æмæ цæмæй объект кæронмæ арæзт æрцæуа, уый тыххæй, 2025-2926 азтæн кæй снысан кодтой, уыцы æхцайы фæрæзтæ нын раздæр дæттынц. Куыстытæ цæуынц æнæкъуылымпытæй.
Фарст: Нæ республикæйы цæрджытæ тынг тыхсынц, æхсæнадон транспорты æдзæллаг куысты тыххæй. Кæй куыд фæнды, афтæ рацæуынц куыстмæ, æмæ бæлццæттæ фæндæгтыл лæугæйæ баззайынц. Цавæр мадзæлттæ аразы нæ республикæйы разамынд уавæр рæстмæ раивыны тыххæй?
Дзуапп: Куыд зонут, афтæмæй райдыдтам транспортон реформæ. Архайæм кæронмæ йæ ахæццæ кæныныл, фæлæ уый æнцон хъуыддаг нæу. Ацы къабазы кусынц, куыд паддзахадон кампанитæ, афтæ амалхъомтæ дæр. Се ‘ппæтимæ дæр хицæнæй аныхас кодтам, æмæ уавæр хъуамæ цæхгæр фæхуыздæр уа, балхæдтам ног автобустæ. Мах домæнтыл чи нæ сразы уа, уыдоны маршруттæй ацæуын бахъæудзæн.
Пресс-конференцийы архайдтой, куыд республикон дзыллон хабархæссæг фæрæзты минæвæрттæ, афтæ блогертæ дæр. Бирæ ахсджиаг фарстатæ раттой регионы Сæргълæууæгмæ, æмæ æнæ ‘рхъуыдыйæ никæй ныууагъта. Бæстон дзуаппытæ ратта, Алагиры бассейн, Михайловскы хъæуы та спортивон фæз кæд сараздзысты, Уæллаг Ларсы фæндаджы уаццæгтæ фæфылдæр сты, фæлæ ма сæм бафтауын æмбæлы æви нæ, Wildberries республикæйы цы уарæн центр аразы, уым уыдзæн 8 мин куысты бынаты, æмæ сæм бынæттон цæрджыты исдзысты æви нæ…
Сергей Меняйло кæд Мæскуымæ, Уæрæсейы Хицауады минæвæрттимæ фембæлдмæ цыд, уыцы бон республикæйы ахсджиаг хъуыддæгты фæдыл, уæддæр пресс-конференцийы архайджытæй алкæмæн дæр ратта бæстон дзуапп. Кæронбæттæны куыд загъта, афтæмæй республикæйы цæрджытæн лæггад кæны зæрдиагæй æмæ йын æхсызгон у, дыууæрдæм бастдзинад ын кæй ис йе ‘мзæххонтимæ, уый.

ГАПБАТЫ Алетæ

ОСТАВЬТЕ ОТВЕТ

Please enter your comment!
Please enter your name here