РЦИ-Аланийы Хицауады Сæрдар ДЗАНАЙТЫ Барис цы кусæг æмбырд сарæзта, уым ныхас цыди 2025-2027 азты курдиæттæ бавдисыны кампанийы архайыны фарстатыл. Ныртæккæ федералон Хицауады профилон оргæнтæм арвыстой, сæ иумæйаг аргъ 50 миллиард сомы кæмæн у, 190 ахæм объекты бюджетон курдиæттæ. Уыдон сты арæзтадон, бындурон рацарæзт, бындурон цалцæг æмæ хæрзвадæттæ аразыны куыстытæ.
– Републикæйы Сæргълæууæг Сергей Меняйлойы фæдзæхстмæ гæсгæ, мах бацæттæ кодтам æмæ федералон Хицауады профилон оргæнтæм арвыстам социалон инфраструктурæ, цæрæнуатон-коммуналон хæдзарад, æнæниздзинад хъахъхъæнынад, ахуырад, культурæ, спорт, фæндагон хæдзарад, æрдзон фæрæзты объектты арæзтад, бындурон рацарæзт æмæ цалцæджы æппæт хъæугæ гæххæттытæ. Мах хъуамæ æмбарæм се ‘ппæты бæлвырд уавæр дæр – кæцы курдиæтты фарс рахæцыдысты, кæцытыл та ма бакусын хъæуы. 2025-2027 азты федералон бюджет сфидар кæныны фæлгæты республикæйы объекттæ финансон æгъдауæй æнæмæнг хъæуы сифтонг кæнын, – бахæс кодта Дзанайты Барис.
Сæрмагондæй премьер-министр бахæс кодта стыр æргом аздахын объектты проектон-сметон гæххæттыты цæттæдзинадмæ. Хицауады Сæрдар ма бафæдзæхста, цæмæй гæххæттыты ма ферох кæной бафыссын нырыккон
хъæугæ ифтонггæрзтæ æмæ ног хæдзарыдзаума дæр.
– Иу хатт дæр ма уын уе ‘ргом здахын: уæ хъуыддæгтæм лæмбынæгдæр кæсут. Курдиæттæ цы объектты тыххæй æрвитæм, уыдонæн стыр социалон ахадындзинад ис нæ рес-публикæйы цæрджытæн. Фидæны аз дæр нæм стыр куыст æнхъæлмæ кæсы, уымæ гæсгæ нын тынг вазыгджын хъуыддаг у ныртæккæ æнтыстджынæй курдиæттæ бадæттыны кампанийы бацархайын, – загъта Дзанайты Барис.
ГАПБАТЫ Алетæ
