2024 азы 29 июлы йæ цардæй ахицæн номдзыд музыкант, дирижер, композитор æмæ ахуыргæнæг Гæздæнты Гаппойы фырт Булат.
Уæрæсе æмæ Цæгат Ирыстоны адæмон артист, Хетæгкаты Къостайы номыл æмæ «Нарты фæткъуы»-йы премиты лауреат, Ирыстоны Фæллойы Хъæбатыр Гæздæнты Булат рай-
гуырд 1936 азы 22 июны Цæгат Ирыстоны Олгинскæйы хъæуы. Йæ цардуалдзæджы банкъардта музыкалон аивадмæ цымыдисдзинад, æмæ йæ дарддæры цардвæндаг уæдæй фæстæмæ баст уыдис музыкæимæ. Астæуккаг скъола каст фæуыны фæстæ, 1952 азы бацыд Дзæуджыхъæуы музыкалон училищæмæ, ам уыцы-иу рæстæг равзæрста цалдæр здæхты: дирижеры дæсныйад, домрæ æмæ гобойæ цæгъдын сахуыр кæнын. 1957 азы йæ ахуыр адарддæр кодта Гнесинты номыл Паддзахадон музыкалон-педагогон институты. Гæздæнты Булат сфæлдыстадон фæндагыл фыццаг къахдзæфтæ акодта 1950-æм азты. Уæд, куыд æппæт Уæрæсейы, афтæ Ирыстоны дæр, култьтурон æмæ музыкалон цард цæджджинагау фыхти. Булат тынг разæнгардæй архайдта республикæйы культурон царды: фыста музыкæ Ирон театры спектакльтæн, уыцы- иу рæстæг куыста Цæгат Ирыстоны Радиокомитеты оркестры. Йæ аивадæн ын стыр аргъ кодтой канд Ирыстоны нæ, фæлæ Цæгат Кавказ æмæ Уæрæсейы.
Гæздæнты Булат уыдис тынг дæсны фæндырдзæгъдæг æмæ курдиатджын композитор. Йæ æгæрон алæмæты аивад тынг хæстæг райстой сæ зæрдæмæ æппæт дунейы музыкæ уарзджытæ, йæ диссаджы курдиаты руа-
джы дзæвгар фæхъæздыгдæр кодта ирон музыкалон хæзнадон. Ахуыргонд, бирæзонаг адæймаг, Булат дæргъвæтин рæстæг йæхæдæг цагъта ирон фæндырæй, уыдис концертмейстер, тынг бирæ йын бантыст музыкалон аивады – ныффыста бирæ зæрдæмæхъаргæ уацмыстæ. Уымæй уæлдай ма, æнтыстджынæй кодта наукон-зонадон æмæ педагогон куыст дæр.
Уæлдай ахадгæдæр у йæ бавæрæн ахуырадмæ. Маэстро сарæзта, ирон музыкалон культурæ бахъахъхъæнынæн стыр ахъаз чи фæци, ахæм ахуыргæнæн чингуытæ: «Ирон фæндырæй цæгъдыны скъола музыкалон скъолаты 1-2 кълæстæн», «Ирон фæндырæй цæгъдыны скъола музыкалон скъолаты 3-5 кълæстæн», «Ирон фæндырæн пьесæты æмбырдгонд».
Гæздæнты Булат бирæ рæстæг уыдис, 2018 азы йын йæ ном кæмæн раттой, Адæмон инструментты уыцы национ паддзахадон оркестры аивадон разамонæг æмæ дирижер.
Гæздæнты Гаппойы фырт Булат йæ диссаджы, æвæджиау курдиаты фæрцы ныууагъта ирд фæд ирон культурæйы, национ музыкæйы бынтæ бахъахъхъæнын æмæ сæ райрæзыны хъуыддаджы. Йæ диссаджы алæмæты курдиаты руаджы йæ ном хъуыстгонд у æппæт Уæрæсейы.
Разагъды æвæллайгæ фæллойгæнæг æмæ стыр патриот Гæздæнты Гаппойы фырт Булаты ном æнусмæ цæрдзæн Ирыстоны цæрджыты зæрдæты.
Сергей МЕНЯЙЛО, РЦИ-Аланийы
Сæргълæууæг,
ТУСКЪАТЫ Таймураз, РЦИ-Аланийы
Парламенты Сæрдар,
ДЗАНАЙТЫ Барис, РЦИ-Аланийы
Хицауады Сæрдар
