Дзӕбӕхгӕнӕн физкультурӕ, ленк кӕнын, бӕстӕзонӕн балцытӕ, музейты экспозицитӕ ӕмӕ театрты ног спектакльтӕ… Ацы ӕмӕ ӕндӕр ахӕм дзӕбӕхгӕнӕн ӕмӕ хиирхӕфсӕн мадзӕлтты лӕварӕй архайыны фадат ис Цӕгат Ирыстоны пенсиисджытӕн.
Уый тыххӕй фехъусын кодта РЦИ-Аланийы Фӕллой ӕмӕ социалон рӕзты министрады пресс-службӕ.
Министрады минӕвары ныхасмӕ гӕсгӕ, республикӕйы ацӕргӕ адӕмӕн уыцы гӕнӕнтӕй спайда кӕныны фадӕттӕ фӕзынд фыццаградон национ проект Демографи»-йы дӕлпрограммӕ «Хистӕр фӕлтӕр»-ы фӕрцы.
Программӕйы сӕйрагдӕр нысан у пенсиисджыты цард цымыдисагдӕр ӕмӕ уӕнгрогдӕр кӕнын, алыхуызон зӕрдылдарӕн бынӕттӕ ӕмӕ культурӕйы объекттӕ фенынӕн гӕнӕнтӕ аразын, хистӕрты физикон культурӕ ӕмӕ ӕндӕр дзӕбӕхгӕнӕн мадзӕлттӕм ӕмхиц кӕнын.
Республикӕйы Фӕллой ӕмӕ социалон рӕзты министрады специалисттӕ архайынц, цӕмӕй, ацӕргӕ адӕмӕн цы дзӕбӕхгӕнӕн-хиирхӕфсӕн программӕтӕ саразынц, уыдон уой мидисджын ӕмӕ пайдайаг. Ӕмӕ сӕ куыст дзӕгъӕлы нӕ вӕййы — программӕ «Хистӕр фӕлтӕр»-ы архайынвӕнд чи скодта, уыцы хистӕртӕй алкӕцыдӕр йӕхицӕн зӕрдӕмӕдзӕугӕ мадзӕлттӕ равзары.
«Хистӕр фӕлтӕры минӕвӕрттӕн уӕлдай кад ӕмӕ аргъ кӕнын нӕ адӕмӕн йӕ туджы ис. Ацӕргӕ адӕймагыл баузӕлын, йӕ цард ын хъомысджындӕр ӕмӕ цымыдисагдӕр фӕкӕнын нӕхицӕн нымайӕм хӕсыл.
Программӕмӕ йе ‘ргом чи аздӕхта, уыцы адӕм уӕлдай ӕхсызгондӕрӕй архайынц, зӕгъӕм, «балцыты клубты» куысты. Уыдоны фӕрцы арӕх вӕййынц бӕстӕзонӕн балцыты нӕ республикӕйы рӕсугъддӕр кӕмттӕ ӕмӕ ӕндӕр бынӕтты. ӕндӕр бонты та — дзӕбӕхгӕнӕн физкультурӕ, балц музеймӕ ӕмӕ афтӕ дарддӕр…
«Хистӕр фӕлтӕр»-ы уагӕвӕрдтӕ ӕххӕст кӕныныл архайынц социалон лӕггӕдты комплексон центртӕ (уыдон кусынц Дзӕуджыхъӕу ӕмӕ республикӕйы ӕппӕт районты дӕр). Программӕйы архайынвӕнд чи скӕна, уыцы пенсиисӕджы бацӕуын хъӕуы, йӕ цӕрӕн бынатмӕ ӕввахсдӕр чи у, социалон лӕггӕдты уыцы центрмӕ. Уыдонӕй уӕлдай, амынд программӕйы фадӕттӕй спайда кӕнӕн ис, 18 азы кӕуыл сӕххӕст, уыцы сахъат адӕмӕн дӕр», — радзырдта Цӕгат Ирыстоны фӕллой ӕмӕ социалон рӕзты министр Айдарты Алинӕ.
КАЛМАНТЫ Аслан
