Цӕгат Ирыстоны фӕндагон инфраструктурӕйы объекттыл куыст куыд цӕуы, уый тыххӕй ныхас цыди, РЦИ-Аланийы Хицауады Сӕрдар ДЗАНАЙТЫ Барис цы ӕмбырд сарӕзта, уым. Архайдтой дзы регионы профилон уагдӕтты разамонджытӕ ӕмӕ муниципалон сконды сӕргълӕуджытӕ.
Транспорт ӕмӕ фӕндагон инфраструктурӕйы комитеты сӕрдар Солиты Тариэл куыд загъта, афтӕмӕй профилон мадзӕлттӕ арӕзт цӕуынц РЦИ-Аланийы паддзахадон программӕтӕ «Фӕндагон инфраструктурӕйы рӕзт» ӕмӕ «Хъӕууон фӕзуӕтты комплексон рӕзт»-ы фӕлгӕты.
— Республикӕйы цӕуы егъау куыст фӕндагон-хӕдзарадон комплекс нырыккон уагыл рацаразыныл. Паддзахадон программӕтӕ ӕмӕ национ проектты бындурыл ацы аз 62 объекты царды рауадзыны тыххӕй лӕвӕрд ӕрцыд 4,8 миллиард сомы. Муниципалон программӕты фӕлгӕты та ма хъуамӕ саразӕм ӕмӕ сцалцӕг кӕнӕм 54 фӕндаджы, сӕ куыстыты аргъ у 330 милуан сомӕй фылдӕр. Регионы разамонӕг Сергей Меняйло цы бадзырдтӕ сарӕзта, уыдонӕн нын федералон бюджетӕй уӕлӕмхасӕн раттой 1,5 миллиард сомӕй фылдӕр. ӕппӕт куыстытӕ дӕр хъуамӕ ӕххӕстгонд ӕрцӕуой бӕрӕггонд ӕмгъуыдтӕм бӕрзонд хӕрзхъӕддзинадимӕ, — бафиппайдта Дзанайты Барис.
Хицауады Сӕрдар сӕрмагондӕй фӕнысан кодта Беслӕны уынгтӕ ӕмӕ фӕндагон хызы рацарӕзт горӕты генералон пъланы фӕлгӕты. Ацы аз цалцӕггонд цӕуынц 16 объекты, сӕ куыстыты аргъ — 660 милуан сомы бӕрц. Куыстытӕ хъуамӕ фӕуой ӕнӕкъуылымпытӕй нысангонд ӕмгъуыдтӕм. Ацы фарстамӕ Дзанайты Барис бафӕдзӕхста уӕлдай лӕмбынӕгдӕр кӕсын.
Хъазуатонӕй арӕзт ӕмӕ цалцӕггонд цӕуынц регионалон ӕмӕ муниципалон скондты ‘хсӕн фӕндӕгтӕ. Ацы аз кусынц, сӕ иумӕйаг аргъ 1,2 миллиард сомӕй фылдӕр кӕмӕн у, ахӕм авд объектыл. Уыдонимӕ — курорт «Мамысон»-мӕ фӕндаджы уаццаг, «Попов Хутор»-мӕ бацӕуӕн, «Транскам» — Уӕллаг Зджыд — Мӕцутӕйы фӕндӕгты рацарӕзт.
Уымӕй уӕлдай ма ацы аз хъуамӕ бындуронӕй рацаразой ӕхсӕз хиды сӕрты ахизӕнтӕ. Уыцы куыстытыл уагъд ӕрцыд 450 милуан сомӕй фылдӕр. Уыцы фӕрӕзтӕ бахардз кӕндзысты ӕрыдон-Красногор- «Транскам», Суадаг — Ногхъӕуы фӕндӕгты хӕйттӕ саразын ӕмӕ Цыкола-Мӕцутӕ-Комы-Арт чи бӕтты, уыцы тъунел бындуронӕй рацаразыныл.
Дзанайты Барис бахӕс кодта Транспорт ӕмӕ фӕндагон инфраструктурӕйы комитетӕн районты сӕргълӕуджытимӕ иумӕ куыстыты цыд ӕмӕ хӕрзхъӕддзинадмӕ иудадзыг лӕмбынӕг цӕст дарын.
ГАПБАТЫ Алетӕ
