Дзӕуджыхъӕуы Национ наукон библиотекӕйы 2-4 августы федералон проекттӕ «Демографи» ӕмӕ «Спорт — нӕ царды фӕтк»-ы фӕлгӕты шахмӕттӕй цырд хъазынӕй цыдысты ӕппӕтуӕрӕсеон ерыстӕ.
Ерыстӕ нымад уыдысты, куыд Уӕрӕсейы Кубок рамбулыныл къӕпхӕн, ӕмӕ дзы архайдтой Цӕгат Кавказы федералон зылды субъекттӕй уӕлдай Мӕскуы, Воронеж, Челябинск, Краснодары край, Бетъырбух ӕмӕ Ростовы облӕсты минӕвӕрттӕ. Дзӕуджыхъӕумӕ цы 150 шахматисты ӕрцыди, уыдоны ‘хсӕн уыдысты 4 гроссмейстеры, 4 дунеон къласы мастеры ӕмӕ 4 ФИДЕ-йы мастеры. Уый дзурӕг у ерыстӕн сӕ ахадындзинадыл.
Ерыстӕ саразджытӕ ссардтой зындгонд тренер Николай Новогрудскийы рухс ном. Шахматистты ‘хсӕн уыдысты, куыд хӕрз ӕрыгон, афтӕ ацӕргӕ спорты ветерантӕ дӕр. Цырд шахмӕттӕй ерыстӕ цыдыс-ты дыууӕ хуызы — блиц ӕмӕ рапидӕй.
Дыууӕ хуызӕй дӕр интеллектуалон тохтӕ рауадысты цымыдисаг. Цырд шахмӕттӕй хъазгӕйӕ, арӕх вӕййы ӕнӕнхъӕлӕджы фӕзындтӕ. Афтӕ рауад ацы хатт дӕр. Зӕгъӕм, ирыстойнаг 13-аздзыд шахматист Владимир Черный иу фембӕлды рамбылдта гроссмейстер Вячеслав Захарцовӕй.
Ирыстойнаг шахматисттӕй бӕрзонд бынӕттӕ бацахсын бантыст фарастӕн. Сылгоймӕгты ерысты 18 азӕй кӕстӕр чызджыты ‘хсӕн фыццаг ӕртӕ бынаты рамбылдтой: 1 — Дриаты Ланӕ, 2 — Цамалаидзе Лианӕ, 3 — Алеся Черная. Ацы кары лӕппуты ерысты фыццаг бынатмӕ рацыд Танделаты Арсений. Ветеранты ‘хсӕн фыццаг бынат рамбылдта Цӕцӕны Республикӕйы минӕвар Руслан Яндарбиев, дыккаг ӕмӕ ӕртыккаг бынӕттӕ та бацахстой ирыстойнаг шахматисттӕ Таматы Таймураз ӕмӕ Николай Рязанов.
Сӕйраг къорды рапидӕй ерысгӕнджыты ‘хсӕн фыццаг бынат рамбылдта мӕскуыйаг шахматист Владимир Захарцов. Дыккаг ӕмӕ ӕртыккаг дӕр систы Мӕскуыйы облӕсты минӕвӕрттӕ Павел Смирнов ӕмӕ Иван Елецкий. Ирыстойнаг шахматист дунеон къласы мастер Тигран Назаретян бацахста 9-ӕм бынат. Зӕгъын хъӕуы уый, ӕмӕ ацы къорды ӕхцайы премитӕ лӕвӕрд цыди фыццаг бынатӕй фынддӕсӕммӕ.
Сылгоймӕгты ‘хсӕн фыццаг бынат рамбылдта Ингӕ Захарцова (Ростовы облӕст), дыккаг ӕмӕ ӕртыккаг бынӕттӕ та бацахстой Юлия Абрамова (Воронежы облӕст) ӕмӕ Раббия Шаипова (Цӕцӕны Республикӕ).
Ирыстойнӕгты хицӕн ерысы рапидӕй турниры уӕлахиздзау сси Уалыты Арсен, фыццаг бынат бацахста Колыты Ирлан, ӕртыккаг бынатмӕ та рацыд Владимир Черный. Блицӕй хъазгӕйӕ та ирыстойнӕгты ‘хсӕн фыццаг бынат бацахста Тигран Назаретян.
Ахӕм турнир Ирыстоны кӕй ацыд, уый нӕ ӕрыгон шахматисттӕн уыд пайдайы хос. Йӕ саразыныл зӕрдиагӕй архайдтой: РЦИ-Аланийы Шахмӕтты федерацийы президент Кадиты Хъазыбег, вице-президент Едзиты Владимир ӕмӕ Ирыстоны Шахмӕтты федерацийы ӕххӕстгӕнӕг директор Цорӕты Алыксандр. Уыдонӕн зӕрдиаг арфӕтӕ фӕкодтой ерысты архайджытӕ, ӕрыгон шахматистты ныййарджытӕ, тренертӕ.
Ӕрвылаз Уӕрӕсейы рапид ӕмӕ блицӕй Уӕрӕсейы Кубок рамбулыныл турниртӕ фӕцӕуынц 12. Уыдонӕй иу ацы аз Ирыстоны кӕй ацыд, уый у хорзы нысан нӕ фӕсивӕды шахмӕтты спортыл ӕнувыд кӕнынӕн.
Ерыстӕ ӕхгӕныны мадзалы Мӕскуыйӕ ссӕуӕг Николай Новогрудскийы фырт Лев Новогрудскийӕн лӕвӕрд ӕрцыд РЦИ-Аланийы Сӕргълӕууӕг Сергей Меняйлойы номӕй арфӕйы фыстӕг. Лев Новогрудский зӕрдӕбын арфӕтӕ ракодта Ирыстоны разамонджытӕ ӕмӕ турнир саразджытӕн, йӕ фыды ном Ирыстоны рох кӕй нӕу ӕмӕ йын ахӕм кад кӕй кӕнынц, уый тыххӕй.
БАСКАТЫ Уырызмӕг
