Октябры Дзӕуджыхъӕуы йӕ куыст кӕндзӕн Креативон индустриты фыццаг кавказаг форум. Уый тыххӕй Хицауады ӕрвылкъуырион аппаратон ӕмбырды фехъусын кодта РЦИ-Аланийы Сӕргълӕууӕг Сергей МЕНЯЙЛО.
Республикӕйы разамонӕджы ныхасмӕ гӕсгӕ, уыцы егъау ӕмбырды архайдзысты креативон индустриты къабазы амалхъомтӕ ӕмӕ эксперттӕ, Цӕгат Кавказы федералон зылды субъектты хицаудзинады оргӕнты минӕвӕрттӕ. Уыдон бӕстон ӕрдзурдзысты къабазы дарддӕры райрӕзты мадзӕлттыл. Форумы программӕйы уыдзӕн мастер-класстӕ, равдыстытӕ, лекцитӕ кӕсдзысты федералон центрӕй хуынд эксперттӕ… Сергей Меняйло, фидӕны ӕмбырды ахадындзинад фӕнысан кӕнгӕйӕ, Цӕгат Ирыстоны Хицауады Сӕрдары хӕдивӕг Платы Альбинӕйӕн бацамыдта, цӕмӕй форуммӕ цӕттӕдзинады фарстатыл бакуса алы ведомствӕты минӕвӕртты сӕрмагонд къорд.
Республикӕйы Сӕргълӕууӕг ӕмбырды архайджыты зӕрдыл ӕрлӕууын кодта ӕндӕр ахсджиаг мадзал дӕр. Зындгонд куыд у, афтӕмӕй 8 ӕмӕ 9 октябры УФ-йы Федералон ӕмбырды Федерацийы Советы цӕудзысты Цӕгат Ирыстоны бонтӕ. Сергей Меняйлойы ныхасмӕ гӕсгӕ, уыцы мадзалы фӕрцы ма иу хатт фадат уыдзӕн хицаудзинады федералон оргӕнты ӕргом РЦИ-Аланийы райрӕзты фарстатӕм раздахынӕн. Уыцы ӕууӕл хынцгӕйӕ, республикӕйы разамонӕг профилон ведомствӕты минӕвӕрттӕн бахӕс кодта, цӕмӕй Цӕгат Ирыстоны бонтӕм цӕттӕдзинады ӕппӕт фарстатӕм дӕр уа фыццаградон цӕстдард.
Ӕмбырды архайджытӕ ӕрдзырдтой цӕрӕнуатон-коммуналон комлекс ӕмӕ энергетикӕйы объектты ӕнӕкъуылымпы куысты фарстайыл дӕр.
Профилон министрады бӕрнон кусджыты дзуаппон докладтӕм байхъусгӕйӕ, республикӕйы Сӕргълӕууӕг бафиппайдта: «Ныртӕккӕ сӕйрагдӕр у цӕрӕнуатон-коммуналон ӕмӕ энергетикон комплекс зымӕджы уавӕрты ӕнӕкъуыхцы куыстмӕ бацӕттӕ кӕнын. «Ростехнадзор» ӕмӕ иннӕ цӕстдарӕг ведомствӕты минӕвӕрттимӕ ногӕй лӕмбынӕг ӕркӕсут, зымӕгмӕ цӕттӕгӕнӕн-цалцӕггӕнӕн программӕтӕ куыд ӕххӕстгонд цӕуынц, уымӕ. Хъармгӕнӕн рӕстӕджы райдайӕнмӕ коммуналон ӕмӕ энергетикон ӕппӕт объекттӕ дӕр хъуамӕ ифтонг уой цӕттӕдзинады паспорттӕй».
Фембӕлды ныхас рауад сӕрмагонд паддзахадон программӕтӕ ӕмӕ фыццаградон национ проектты уагӕвӕрдтӕ ӕххӕст кӕныныл дӕр. Уыдоныл кусгӕйӕ, Сергей Меняйлойы ныхасмӕ гӕсгӕ, республикӕйы арӕзт ӕмӕ цалцӕггонд цӕуы бирӕ ахсджиаг социалон объекттӕ. «Арӕзтад ӕмӕ архитектурӕйы министрады, иннӕ бӕрнон ведомствӕты, районты администрациты разамындӕй курӕг дӕн, цӕмӕй, амынд программӕтӕ ӕмӕ проектты фӕлгӕты архайд цы объекттыл цӕуы, уыдоны цӕттӕдзинадмӕ здӕхт уа уӕлдай бӕстон цӕстӕнгас», — бацамыдта Цӕгат Ирыстоны Сӕргълӕууӕг.
Аппаратон ӕмбырды ныхас цыд республикӕйы ӕрвылбоны царды ӕндӕр вазыгджын фарстатыл дӕр. Дзуаппон докладтӕ скодтой РЦИ-Аланийы Хицауады Сӕрдары хӕдивӕг Томайты Ирбег, Мӕздӕджы районы бынӕттон хиуынаффӕйады администрацийы сӕргълӕууӕг Станислав Никифоров ӕмӕ иннӕтӕ.
СЛАНТЫ Аслан
