Ног ахуыры азы райдайӕнмӕ ма баззад нымад бонтӕ. Уыцы рӕстӕгӕй хъуамӕ хӕдзардзинӕй спайда кӕной, ахуыргӕнӕндӕттӕ ӕмӕ цалцӕггӕнӕн куыстытӕн разамынд чи дӕтты, уыдон.
Дзӕуджыхъӕуы ӕхсӕнадон советы сӕрдар Михаил Шаталов фӕсидт советы уӕнгтӕм, цӕмӕй иумӕйаг тыхтӕй сбӕрӕг кӕной горӕты скъолаты цӕттӕдзинад ног ахуыры азмӕ. Сӕрмагонд пункттӕм гӕсгӕ хъуамӕ ӕркӕсой, цы хъуыд саразын, куыд сарӕзтой ӕмӕ ма, цавӕр цалцӕггӕнӕн куыстытӕ нысан кӕнынц, уыдӕттӕм. Уӕлдай хъусдард — бындурон цалцӕггӕнӕн куыстытӕ кӕм цӕуы, уыцы ӕхсӕрдӕс скъоламӕ. Советы уӕнгтӕ адих сты ӕхсӕз кусӕг къордыл, алчидӕр дзы йӕхимӕ айста цыппар-фондз скъолайы, ӕдӕппӕтӕй та хъуамӕ сбӕрӕг кӕной 32 ахуыргӕнӕндоны.
Михаил Шаталов, йемӕ ма Исай Исаев ӕмӕ Мӕрзойты Феликс сӕ кусӕг балц райдыдтой 5-ӕм скъолайӕ. Кӕд скъолайы администрациимӕ фӕмбӕлын къухы нӕ бафтыд, уӕддӕр нӕм рацыд арӕзтадон организаци «Альтаир»-ы прораб Баймӕтаты Сослан. Уый нын равдыста агъуыстытӕ, радзырдта, цавӕр цалцӕггӕнӕн куыстытӕ ахицӕн кодтой, уый тыххӕй. Йӕ ныхӕстӕм гӕсгӕ, ӕртыккаг уӕладзыджы куыстытӕ фесты. Ныртӕккӕ сӕ тыхтӕ сарӕзтой хӕрӕндонмӕ, цӕмӕй сывӕллӕттӕн сӕ фыццаг ахуыры бонӕй уа хъарм хӕринаг.
5-ӕм скъолайы цалцӕггӕнӕн куыстытӕ райдыдтой апрелы. Фыццаг бакастӕй ма дзы ис бирӕ бакусинаг ӕмӕ алыг кӕнинаг фарстатӕ, фӕлӕ Баймӕтаты Сослан зӕрдӕ бавӕрдта, нысангонд куыд у, афтӕ йын йӕ иу хай срӕвдз кӕндзысты майрӕмы мӕйы 28 бонмӕ, иннӕмӕ та бавналдзысты 2025 азы. Михаил Шаталов куыд бафиппайдта, афтӕмӕй, скъолайы арӕзтадон-цалцӕггӕнӕн куыстыты бӕрцмӕ гӕсгӕ, ӕппынкъаддӕр хъӕуы сӕдӕ кусӕджы уыцы иу рӕстӕг. Мах дзы баййӕфтам ӕхсӕз ӕмӕ ссӕдз адӕймаджы, семӕ — хистӕркъласонтӕ. Хуыгаты Арсен, Джиоты Артур, Константин Углов ӕмӕ Бабочиты Мӕирбег зӕрдиагӕй архайынц сӕ уарзон скъолайы срӕсугъдыл ӕмӕ йӕ ахуыры азмӕ бацӕттӕ кӕныныл. Фӕсивӕды архайдӕй разыйӕ баззадысты советы уӕнгтӕ дӕр.
— Цалцӕггӕнӕн куыстытӕ дыууӕ азыл кӕй адих кодтой, уый раст хъуыды у, — зӕгъы Михаил Шаталов. — Бузныг горӕты хицау Милдзыхты Вячеславӕн, ацы ӕмӕ иннӕ скъолаты цалцӕгмӕ стыр ӕргом кӕй здахы, уый тыххӕй.
Дарддӕр кусӕг къорды уӕнгтӕ бабӕрӕг кодтой 28-ӕм скъола. Ам ныл фембӕлд скъолайы завхоз Хъӕрджынты Руслан ӕмӕ нын радзырдта, цавӕр куыстытӕ бакодтой, уый. Аивтой плинтустӕ, сахуырстой ӕмӕ чъырӕй сцагътой бӕстыхӕйттӕ. Скъола кӕд ногарӕзт у, уӕддӕр у стыр, ӕмӕ алы хӕдзарадон фарстыл дӕр хъӕуы рӕстӕгыл бакусын. Мах ам федтам, зӕрдӕйӕ йӕ хӕстӕ чи ӕххӕст кӕны, ахӕм адӕймаджы, кӕцы йе ‘мкусджытимӕ бацархайдта скъолайы цӕттӕдзинадыл. Ныртӕккӕ архайынц ног техникон кълас байгом кӕныныл. Михаил Шаталов разыйӕ баззад скъолайы уавӕрӕй ӕмӕ зӕрдиагӕй раарфӕ кодта Хъӕрджыны-фыртӕн.
Цалцӕггӕнӕн куыстытӕ кӕронмӕ фӕхӕццӕ кӕнынц 18-ӕм скъолайы дӕр. Директоры хӕдивӕг Иринӕ Ляднова нын куыд радзырдта, афтӕмӕй цалцӕггонд цӕуынц дыккаг ӕмӕ ӕртыккаг уӕладзгуытӕ.
— Аразджытӕ фынддӕсӕй кӕнынц аивгӕнӕн-фӕлындӕн куыстытӕ. Ацы скъолайы дӕр цалцӕггӕнӕн куыстытӕ цӕудзысты дыууӕ хайӕ ӕмӕ уӕд бавналдзысты хӕрӕндонмӕ дӕр, — радзырдта нын бригадир Наниты Руслан.
Фарстатӕ сӕвзӕрд, иннӕ скъолатӕ чи бӕрӕг кодта, уыцы кусӕг къордтӕм дӕр. Зӕгъӕм, алы скъолайы дӕр хъуамӕ уой иухуызон арӕзт паддзахадон символтӕ. Уӕдӕ, кӕцыдӕр скъолаты цалцӕг кӕнынц акты залтӕ, фӕлӕ хӕрдзтӕм хаст не ‘рцыдысты бандӕттӕ ӕмӕ хъӕугӕ кусӕнгӕрзты аргъ. Ацы ӕмӕ ма иннӕ фарстатӕ ӕрвыст цӕудзысты, дзуапп сын чи дӕтты, уыцы бӕрнон кусджытӕм.
— Мах критикӕйы тыххӕй нӕ кӕнӕм ацы куыст, — бахыгъта Михаил Шаталов, — фӕлӕ хъуамӕ нӕ архайды кӕронбӕттӕн нысан уа иумӕйаг архайдӕй бакусын лыггӕнинаг фарстатыл, уымӕ сиды нӕ бӕстӕйы Президент дӕр.
МАМИАТЫ Лолитӕ,
къам систа Владимир ИВАНОВ
