Рæстæг, рæстæг, ма мæм кæс…
Рæстæг, бамбæхс цæй, дæ цæст.
Ма æруадз дæ уæз мæныл,
Мæныл æмæ ме ‘мбæлттыл…
(Джусойты Æхсар)
Ныр цалдæр боны рацыд, нæ сыхы, Денджызонты уынджы стыр
зианы хабар куы æрцыд… Елхоты хъæубæстыл æмæ æгас Ирыстоныл дæр айхъуыст бæллæхы хабар Украинæйæ. Нал ис Гæззаты Георгийæн йæ зынаргъ, йæ усгур лæппу Гæззаты Тамерлан. Ацы аз, февралы мæйы бафыс-
та бадзырд æмæ барвæндонæй ацыд æфсады рæнхъытæм.
Украинæйы зæххыл бархъомыс, ныфсхаст хъæбатыр лæппу йе ‘мбæлттимæ апрелы райдайæны карз тохы бацыд знæгтимæ, фæцæф æмæ ма фæстаг туджы ‘ртахы онг уæддæр иунæгæй, бынат ивгæйæ æмæ туг калгæйæ, хæцыд цыппар боны 50 фашисты ныхмæ. Знæгтæ йæ куы нæ ардтой, уæд ссыгътой быдыры хус кæрдæг… Бирæ рæстæг æй нымадтой æбæрæгæй сæфтыл. Фæстæдæр, цыппар мæйы фæстæ йын йæ мард ссардтой сыгъд быдыры…
– Тамиччы зыдтон мæй æмæ æрдæджы бæрц. Раст, цыма, иумæ рагæй кæрæдзи зыдтам, – дзуры йæ хæстон æмбал Магомет Клычев – иумæ уыдыстæм 10-æм танкты дæлхайады, иумæ цæхх-къæбæр дих кодтам, нæ хæслæвæрдтæ иумæ æххæст кодтам, нæ зын, нæ тох хæсты быдыры уыд иу. Уыд æцæг адæймаг! Цардбæллон, хъæлдзæг, дзырдта-иу, бинонтæ кæй æркæндзæн фæсхæст. Тынг зын мын у, йæ фæндтæ нæ сæххæст сты… Хæст æгъатыр у…
Тамик ахуыр кодта Елхоты бирæкъабазджын колледжы. Фæстæдæр дыууæ азы баслужбæ кодта Гæрзифтонг тыхты рæнхъыты.
2008 азы, Гуырдзыстонимæ ныхлæуды рæстæг, уыд Хуссар Ирыстоны. 2010 азæй 2012 азмæ службæ кодта Цæцæны зæххыл.
Кадимæ бавæрдтой Гæззаты Георгийы фырт Тамерланы хъæубæсты адæм йæ райгуырæн хъæуы… Ирон адæмы ныфсхаст, æхсарджын æмæ намысджын хъæбатыр хъæбулы ном рох нæ уыдзæн, цалынмæ цæрæм, уæдмæ.
Бызыккаты Земфирæ
