Республикæ Цæгат Ирыстон-Аланийы Парламенты Советы уыд радон æмбырд. Амыдта йæ Парламенты Сæрдар ТУСКЪАТЫ Таймураз.
Депутаттæ æркастысты æмæ равзæрстой республикæйы социалон-экономикон æмæ æхсæнадон-политикон цардимæ баст закъæтты æмæ Парламенты уынаффæты проекттæ.
Советы уæнгтæ æрныхас кодтой «Хæстон намысы цæрæн бынат»-ы Республикæ Цæгат Ирыстон-Аланийы кадджын номы тыххæй» Республикæ Цæгат Ирыстон-Аланийы закъоны проектыл. Парламенты йæм æркæсынмæ документ бацæттæ кодта республикæйы Сæргълæууæг. Иннæ аз бæрæг кæндзыстæм Фыдыбæс-
тæйы Стыр хæсты Уæлахизы 80 азы. Æмæ, закъоны проекты куыд загъд ис, афтæмæй, уыцы боны кадæн историон рæстдзинад бахъахъхъæныны, хъæбатырты ном сæнусон кæныны тыххæй æмæ рæзгæ фæлтæры патриотон хъомылады нысанимæ сфидар кæнын хъæуы «Хæстон намысы цæрæн бынат»-ы кадджын ном æмæ йæ дæттын, Фыдыбæстæйы Стыр хæсты азты тох уæлдай карздæр кæм цыд, æмæ адæм æнæкæрон хъæбатырдзинад кæм равдыстой, нæ республикæйы уыцы цæрæн бынæттæн. Закъоны проекты фæдыл ныхас кодта Парламенты закъонæвæрынады, закъонад æмæ бынæттон хиуынаффæйады комитеты сæрдар Черчесты Аслан.
Черчесы-фырт ма æркæсынмæ цы закъæтты проекттæ рахаста, уыдон карздæр кæнынц коррупцийы ныхмæ мадзæлттæ, фылдæр кæнынц сæрмагонд æфсæддон операцийы архайджыты æмæ сæ бинонты бартæ, нывыл кæнынц бынæттон хиуынаффæйады архайд, ивддзинæдтæ хæссынц Республикæ Цæгат Ирыстон-Аланийы иуæй-иу закъонæвæрынадон акттæм.
Уæрæсейы иннæ регионты закъонæвæрынадон оргæнтимæ нæ республикæйы Парламенты бастдзинæдтæ азæй-азмæ кæнынц фидардæр æмæ парахатдæр. Афтæ, цæгатирыстойнаг депутаттæн нырæй фæстæмæ бастдзинæдтæ уыдзæн Рес-
публикæ Башкортостаны Паддзахадон Æмбырд – Курултай, Тюмены облæс-
ты Думæ æмæ Цæцæны Республикæйы Парламентимæ. Уый фæдыл Цæгат Ирыстоны Парламент рахаста æмбæлгæ уынаффæты проекттæ.
Советы уæнгтæ байхъуыстой «2017-2027 азты Республикæ Цæгат Ирыс-
тон-Аланийы промышленносты райрæзты», паддзахадон программæ царды рауадзынæн 2022-2023 азты Республикæ Цæгат Ирыстон-Аланийы промышленность æмæ инвестициты министрад республикон бюджетæй лæвæрд фæрæзтæй цас æнтыстджынæй æмæ хæдзардзинæй спайда кодтой, уый сбæрæг кæныны тыххæй» Республикæ Цæгат Ирыстон-Аланийы Цæстдарæн-нымайæн палатæйы хъусынгæнинагмæ. Уый фæдыл раныхас кодта Цæстдарæн-Нымайæн палатæйы аудитор Айларты Алан. Куыд загъта, афтæмæй программæйы нысантæ уыдыс-
ты промышленносты райрæзтæн, стæй, къабазы архайджытæ кæрæдзийы ныхмæ фæлæууынхъом куыд уой æмæ уыцы хуызы фидардæр куыд кæной, уымæн мадзæлттæ аразын. «Нымæцтæм куы æркæсæм, уæд 2022 азы нысантæ æххæст æрцыдысты 99 процентæй, сæ сæххæст кæнынæн бахъуыд 31 милуаны 599 мин сомы, 2023 азы нысантæ та – 99,9 процентæй, бахъуыд сын 194 милуаны 665 мин сомы», – загъта раныхасгæнæг æмæ бæстон æрдзырдта, промышленность æмæ инвестициты министрад, стæй, Промышленносты райрæзты фонд цавæр бадзырдтæ арæзта, бизнес-пълантæ æххæст кæнынæн нысанмæарæзт гранттæ цал радта æмæ уыцы пълантæ æххæст кæнынмæ цавæр цæстдард цыд, æппæт уыдæттыл.
Фарстайы фæдыл æмдоклад скодта Парламенты промышленносты, транспорты, бастдзинад æмæ амалхъомады комитеты сæрдар Киситы Мурат. Раныхас ма йыл кодта промышленность æмæ инвестициты министр Мæрзойты Владимир. Йæ ныхасмæ гæсгæ, бизнес-пълантæ æххæст кæнынæн лæвæрд фæрæзтæй амалхъомтæ куыд пайда кæнынц, уымæ цæуы иудадзыг цæстдард, æмæ уый бындурыл хатдзæгтæ скæнынц.
Фарстытæ æмæ фиппаинæгтæ уыд Тускъаты Таймуразмæ, Парламенты Сæрдары хæдивæг Дойаты Светланæмæ, депутат Черчесты Асланмæ.
Советы уæнгтæ ма цы закъæтты проекттæ равзæрстой, уыдоны фæдыл ныхас кодтой Парламенты Сæрдары хæдивæг Гутнаты Аслæнбег, Парламенты профилон комитетты сæрдартæ Еленæ Князева, Кочораты Олег, Джиоты Георги.
Уымæй уæлдай, депутаттæ бахастой ивддзинæдтæ Парламенты Регламенты фæдыл къамисы скондмæ æмæ сфидар кодтой Парламенты æмбырды боны фæтк. Уыцы фарстаты фæдыл ныхас кодта Тускъаты Таймураз.
ДЕДЕГКАТЫ Зæлинæ
