Цæгат Ирыстоны Медицинон академийы скодтой «Нырыккон дунейы адæймаджы карæн æмæ царды хæрзхъæддзинадæн разамынд дæттын. Æцæгдзинæд æмæ фадæттæ»-йы дисциплинæты ‘хсæн æппæтуæрæсеон регионалон конференци. Йæ архайджытæм арфæйы ныхæстимæ фæсидт РЦИ-Аланийы Хицауады Сæрдар Дзанайты Барис.
– Ацы конференци махмæ фыццаг хатт конд нæ цæуы. Ахсджиаг нын у, алы аз дæр æй нæ медицинон ахуыргæнæндоны фæзмæ кæй рахæссут, уый. Нæ академи æрмæст нæ регионæн нæ цæттæ кæны дохтыртæ, фæлæ æппæт Цæгат Кавказæн дæр. Адæймаджы карæн æмæ йæ царды хæрзхъæддзинадæн разамынд дæттыныл ныхас ахсджиаг ссис. Дзæбæх æууæлтæ æмæ хи æнæниздзинадмæ бæрнон уæвын хъуамæ сабидугæй райдайæм, уыцы мадзæлттæн хъуамæ паддзахадон æмвæзады дæр цæсдард уа.
Нæ республикæйы разамынд æнæниздзинады раззагдæр технологитæм æмæ фадæттæм йæ хъус дары. Нæ хæс у нæ граждæнты царды уавæртæ хуыздæр кæнын, абоны ныхасæн йæ ахадындзинад бæрзонд кæй уыдзæн, уый мæ уырны, – загъта Дзанайы-фырт.
Æрбацæуæг уазджыты раз раныхас кодтой Уæрæсейы Æнæниздзинад хъахъхъæнынады министрады эндокринологийы низтæ иртасыны
центрты разамонæджы хæдивæг, Уæрæсейы Наукæты академийы уæнг-уацхæссæг Екатеринæ Трошина, Медицинон академийы ректор Олег Ремизов, иннæ архайджытæ.
Дисциплинæты ‘хсæн æппæтуæрæсеон конференци конд æрцыд Уæрæсейы Æнæниз-
дзинад хъахъхъæнынады министрады эндокринологийы низтæ иртасыны центры, Цæгат Ирыстоны Æнæниздзинад хъахъхъæнынады министрады æмæ «Стройная Росси», зæгъгæ, уыцы æппæтуæрæсеон æхсæнадон змæлды руаджы.
Хъуыддæгтæ бантыстысты Медицинон академийы 85 азы, Ирыстон Уæрæсеимæ æрбаиуы 250 азы, Дзæуджыхъæуы 240 азы æмæ Цæгат Ирыстоны автономийы 100 азы кадæн.
Дзæуджыхъæумæ ссыдысты Уæрæсейы раззагдæр, номдзыддæр специалисттæ, æрныхас кодтой эндокринон системæйы, гастроэнтерологийы æмæ æндæр низты тыххæй, царды æмæ æнæниздзинады зындзинæдтыл, дæргъвæтин рæстæг цæрыны фарстатыл. Конференцийы эксперттæ ма сæмбæлдысты нæ республикæйы ахуыргæнæндæтты дæр, бацамыдтой сæ арæхстдзинæдтæ, скодтой интерактивон уроктæ.
РЦИ-Аланийы
Сæргълæууæг æмæ Хицауады
пресс-службæ
