Дзæуджыхъæуы байгом Радио æмæ телеуынынады сигнал дæттæг центры ног административон бæстыхай. Коллективæн арфæ ракодта РЦИ-Аланийы Сæргълæууæг Сергей Меняйло.
Ацы кадджын хъуыддаджы архайдтой Уæрæсейы радио æмæ телеуынынады хызы генералон директоры хæдивæг Виктор Горегляд æмæ республикæйы Нымæцон рæзты комитеты сæрдар Гахаты Даниил. Сергей Меняйло куыд загъта, афтæмæй Уæрæсейы радио æмæ телеуынынады хызы разамынд стыр куыст кæнынц Цæгат Ирыстоны радио æмæ телеуынынады рæзты тыххæй.
«Абон ног технологиты дуг у, уыдонимæ ис нымæцон телеуынынад дæр. Æхсызгонæй кæсын, ног мæсыггонд арæзт куыд цæуы, уымæ, ацы бæстыхай та фадат ратдзæн, цæмæй республикæйы радио æмæ телеуынынад хæрзхъæдæй сæ нысантæ æххæст кæной, уымæн. Бузныг нæ уæрæсейаг хæлæрттæн, аразджытæн, æнтыстджын ут!», – загъта республикæйы Сæргълæууæг.
Ног административон бæстыхай арæзт æрцыд республикæйы разамынды æххуысæй, кусдзысты дзы 80 адæймаджы. Ныр фадæттæ фæпарахатдæр уыдзысты, телеуынынады æмæ радиойы сигнал æнæкъуылымпытæй адæммæ хæццæ кæндзысты. Ног бæстыхай ахæссæн ис республикæйы радио æмæ телеуынынады хызы рацарæзты фыццаг къæпхæнмæ. Дарддæр скусдзæн ног техникон бæстыхай æмæ ног мæсыггонд, йæ бæрзæнд уыдзæн 210 метры.
РЦИ-Аланийы
Сæргълæууæг æмæ
Хицауады
пресс-службæ
