Цæгат Ирыстоны фæфылдæр промышленнон куыстады индекс. Ацы азы январæй августмæ индексы рæзт рауад 125,2 проценты. Рæзтыл фæбæрæг хомагкуыстгæнæг къабаз, уым промышленнон куыстады индекс схызт 141,3 процентмæ.
Хойраджы продукттæ уадзыны индекс рауад 114,7 проценты, нозты рауагъды индекс – 119,8 проценты. Ацы нымæцтæ æрмæст промышленносты хъомысы рæзт не ‘вдисынц, фæлæ фæлхасгæнджыты ‘рдыгæй бынæттон продукцимæ ахаст дæр.
Уæлæдарæсы рауагъд 110,3 проценты фылдæр фæцис, гæххæтт æмæ гæххæттын дзаумайы рауагъд – 130,4 проценты рауад. Промышленнон куыстуæтты уæйгонд продукцийы бæрц 9,9 проценты фылдæр фæцис. Йæ аргъ – 39034,8
милуан сомы.
Куыстадон архайды разæй ис пайдайаг къахæнтæ исыны хъуыддаг – йæ рæзт рауад 144,1 проценты. Кæд æмæ иумæйаг уавæр нывыл у, уæддæр кæцыдæр къабæзтæ æййафынц къуылымпытæ. Зæгъæм, хæдзары хъæдын дзаума уадзыны хъуыддаг 16,7 проценты фæкъаддæр. Цемент æмæ бетоны продукци та – 3,9 проценты.
Уавæртæ куыд ивынц, фæлхасгæнджыты ахаст, æнæмæнг, нымайын хъæуы.
Датиты Ольгæ
