Цæгат Ирыстоны дыргъгуыстгæнæн хæдзарæдтæ сæ тыллæг æрæмбырд кодтой, æмæ, Хъæууон хæдзарады министрад куыд фехъусын кодта, афтæмæй, афæ-дзы бæрæггæнæнтæм гæсгæ нæ республикæйы аграрон
куыстуæттæ иумæйагæй æрæмбырд кодтой 45 мин тоннæйы бæрц дыргътæ. Фароны нымæцтимæ абаргæйæ, уый у къаддæр – уæд тыллæг иумæйаг бæрц уыдис 50 мин тоннæйы.
Дыргъты тыллæджы фылдæр хай у фæткъуы – йæ 95 проценты. Ам тынгдæр раппæлинаг у æнæххæст бæрнондзинады организаци «Казачий хутор». Йæ дыргъдæттæ сæхи айтыгътой Æрхонкæйы станицæйæ Фарныхъæумæ хæстæг фæзуаты. Фæллойгæнджытæ фарастсæдæ гектарæй æрæмбырд кодтой 34 000 тоннæйы фæткъуы. Хæдзарады зæххыты фылдæр хайы рæзынц товарон сортытæ «Голден», «Гренни Смит», «Гала», «Ред Делишес» æмæ бирæ æндæртæ.
Ацы хъæугæ хъуыддаджы дыккаг бынат ахсы Црауы хъæуы æнæххæст бæрнондзинады куыстуат «Владка». Цы 122 гектары сæм ис, уыдонæй витаминон продукци систой 3 мин тоннæйы — фæткъуыйы сортытæ «Гала», «Фуджи», «Голден», «Ред делишес», «Гренни Смит». Хæдзарады специалисттæ куыд зæгъынц, афтæмæй, цы нысантæ æвæрдтой сæ размæ, уыдон къухы нæ бафтыдысты, майы кæй фæуазалтæ кодта, стæй сæрды мæйтæ та æгæр тæвд кæй хастой, уый аххосæй. Црайуæгты кæрдоты тыллæг дæр уыцы аххоссæгты тыххæй рауад ацы аз ныллæг.
Республикæйы дыргъ-гуыстгæнæн иннæ хæдзарæдты фæллойадон бæрæггæнæнтæ сты ахæм: «Де-Густо» (2128.5 тоннæйы), «Аланийы дыргъдæттæ» (1223 тоннæйы), «Аланийы хæххон дыргъдон» (415 тоннæйы ), хъæууонхæдзарадон куыстадон кооператив «Задхуым» (177 тоннæйы).
Продукцийы фылдæр хай лæвæрд цæуы республикæйы базарадон куыстуæттæм, стæй йæ æрвитынц Уæрæсейы Федерацийы алы регионтæм.
ГАПБАТЫ Алетæ
