Нæ газеты, амæй размæ куыд фыстам, афтæмæй Дзæуджыхъæуы Хъуылаты Бадзийы номыл спортивон галуан «Манеж»-ы цыдысты, йе ’нæниздзинад хъыгдард кæмæн у, уыцы спортсменты республикон спартакиадæйы ерыстæ.
Спартакиадæ аразæг у РЦИ-Аланийы Фæллой æмæ социалон райрæзты министрад æмæ цыди цыппæрдæсæм хатт. Йæ нысан у æххуысхъуаг адæймæгтæн физикон культурæ æмæ спорты фæрцы се уæнгты тых фидардæр кæнын, сæ зæрдæты сын ныфс æмæ цардмæ тырнындзинад гуырын кæнын.
Спартакиадæйы цы 220 спортсмены архайдтой, уыдон дихгонд уыдысты дыууæ карыл: 14-17 æмæ 18 азæй хистæртæ.
Спортсментæ сæ хъару æмæ арæхстдзинад æвдыстой рог атлетикæ (60 метрмæ згъорын, дæргъмæ гæпп кæнын æмæ эстафетон дугътæй), пурти æппарын, инвалидон коляскæтыл дугътæ, дартс æхсын, шашкæтæй хъазын, бæндæн ивазын æмæ стъолыл хъæзтыты хуызтæй.
Куыд алы ерысты, афтæ ацы спартакиадæйы дæр уыди фæуæлахизуæвджытæ, фæлæ дзы нæ уыд фæхæрдуæвджытæ. Уæнгхъуаг кæнæ, æндæр низтæй хъыгдард адæймаг йæхимæ хъусыны бæсты ерысы куы бацæуа, уæд уый у хи лæмæгъдзинадыл фæуæлахиз уæвын, æмæ уымæн йæ аргъ къаддæр нæу, сыгъзæрин майдан рамбулынæй.
Ерысты хицæн спортсменты ’хсæн уæлахиздзаутæ систы: Тъехты Вало, Хъойбайты Зауыр, Дзидзойты Георги, Гуыбаты Марат, Калоты Элинæ, Гуыбаты Ланæ, Дзоцъиты Георги.
Командон ерысты бæндæн ивазынæй кæстæрты ’хсæн уæлахиздзаутæ систы: фыццаг – Дзæуджыхъæуы Цæгат-Ныгуылæн район, дыккаг – Рахизфарсы район, æртыккаг – Дыгуры район.
Хистæрты ерысы дæр фыццаг бынат бацахста Цæгат-Ныгуылæны районы командæ, дыккаг ссис æхсæнад «Дарите добро», æртыккаг бынатмæ та рацыд командæ «Милосердие».
Ноджыдæр ма иу командон ерысты «Модули» фыццаг бынат рамбылдта Æрæфы районы командæ, дыккаг ссис Дыгуры район, æртыккаг бынатмæ та рацыдысты Цæгат Ныгуылæн районы спортсментæ.
Спартакиадæйы ацыды тыххæй Уæрæсейы сгуыхт тренер, ерысты сæйраг тæрхонгæнæг Гаглойты Валери загъта: «Нæ спартакиадæйы архайдтой æртын командæйы. Мах стыр бузныг зæгъæм, нæ республикæйы разамонджытæ æмæ нæ зындгонд спортсментæй ардæм чи ‘рбацыд, уыдонæн. Ноджы ма, ацы спартакиадæмæ рынчын чи баййæфта, ахæм æвзонг лæппутæ æмæ чызджытæй чи бакæсы, уыдоны æрфæнды махмæ скъоламæ æрбацæуын тренировкæ кæнынмæ. Цæмæй нæ ерыстæ æнæкъуылымпыйæ ацæуой, уый тыххæй нын алы хатт дæр стыр æххуыс бакæнынц Терчыфалейы районы бынæттон администрацийы кусджытæ. Сæ сæргъы Гуыриаты Дианæ, афтæмæй тынг бацархайынц æппæт дæр бæстонæй саразыныл, стæй ерыстæн финансон æгъдауæй æххуысгæнджытæ ссарыныл. Æмæ йæ уæхæдæг федтат, уæлахиздзаутæ æмæ призон бынæттæ бацахсджытæ райстой кубоктæ, майдантæ, грамотæтæ æмæ дипломтæй уæлдай, зынаргъ лæвæрттæ дæр. Суанг ма спортсменты иузæрдион фарсхæцджытæ дæр райстой нæ лæвæрттæ. Уынæм æй, ахæм ерыстæ аразын хъæугæ хъуыддаг кæй у, уый, æмæ сыл кусдзыстæм дарддæр».
Баскаты Уырызмæг,
къамтæ систа Татьянæ Шеходанова
