Джеоргуыбайы кувæн къуырийы кадæн Дзæуджыхъæуы Спортивон цæттæгæнæн центры ацыдысты республикон ерыстæ ирон националон спорты хуызтæй. Мыггæгты 10 командæйы: Абайтæ, Багатæ, Бирæгътæ, Гаглойтæ, Зæгъойтæ, Туатæ, Хетæгкатæ, Хуыгатæ, Хуыбиатæ, Цгъойтæ.
Ерыс кодтой дур æхсын, чъопп, ивазæнтæ, фат æмæ ‘рдынæй, стæй хъил ивазынæй. Хорз спортивон цæттæдзинад равдыстой æппæт мыггæгты хæдахуыр спорт-сментæ дæр, фæлæ Хуыгатæ, Дзæгъойтæ æмæ Хуыбиаты минæвæрттæ разындысты тыхджындæр æмæ бацахстой 1-аг, 2-аг æмæ 3-аг бынæттæ. Командæтæ хорзæхджынгонд æрцыдысты ‘хцайы премитæй.
– Фыццаг хатт архайдтам ахæм мадзалы, рацыдыстæм æртыккаг бынатмæ. Иннæ аз
хуыздæр бацæттæ кæндзыстæм, цæмæй фыццаг бынат райсæм, – загъта ерысты фæстæ Хуыбиаты Руслан. Æмæ ма йæм бафтыдта:
– Ирыстоны адæмы, йæ мыггæгты, стæй фæсивæды иудзинадæн ахæм
хъуыддæгтæ стыр ахъаз сты. Разæнгард сæ кæнынц æнæниз царды уагмæ, рæстæг пайдаимæ ‘рвитынмæ. Æрыгæттæ кæрæдзи хуыздæр базонынц. Спортивон ерыстæм нæ мыггаджы командæ бацæттæ кæныныл зæрдиагæй бацархайдтам Хуыбиаты Альберт æмæ Зелимханимæ. Уырны нæ, ацы ерыстæн хорз фидæн кæй ис, уый.
БЕКЪОЙТЫ Ларисæ
