Фæззæджы бæркадæй дзаг бæрæгбон сарæзтой Цæгат Ирыстоны базарадон-экономикон техникумы. Алы бæрæгбон дæр адæмы цардæй равзæргæ у. Ирон адæммæ кадджындæртæ æмæ дзаджджындæртæй иу у Уастырджимæ кувæн къуыри. Иу кæны адæмы, фарн сын æфтауы сæ удтыл, фидардæр кæны нæ фыдæлты æгъдæуттæ.
Уыцы стыр нысанимæ ныр æвдæм хатт арæзт цæуы национ фестиваль «Фыдæлты фарн» – ирон адæмы традицитæ, культурæ æмæ историйы зонындзинæдтæ парахат кæнын фæсивæды ’хсæн, Фыдыбæстæ æмæ мадæлон æвзагмæ сæм уарзондзинад гуырын кæнын. Фестивалы архайынмæ сæ курдиæттæ балæвæрттой 72 скъолайы. Алы хъæутæ æмæ горæттæй 14-16-аздзыд чызджытæ æмæ лæппутæ ерысы бацæудзысты, сæ тых, сæ хъару, сæ зонындзинæдтæ равдисдзысты истори, культурæ æмæ традицитæ зонынæй, бæгæны фыцынæй, чъиритæ кæнынæй, суанг нарты хъæзтыты архайынæй.
– Махæн не стыр хæс у сывæллæттæн равдисын, куыд зынаргъ у хæлардзинад, уæлдайдæр та ныртæккæйы зын рæстæг. Бирæ азты нæ республикæйы хæларæй цæрынц 111 адæмыхатты минæвæрттæ. Нæ тых нæ иудзинады ис, æмæ нын æй мачи райсæд! – зæгъы техникумы директор Æбиты Валери.
Бæрæгбонхуыз уыд ахуырады бæстыхай. Бахизæны – аив фæсивæд, сæ уæлæдарæсæй æвдыстой алы адæмыхæттыты.
Инннæрдыгæй та уазджытæ цымыдисæй кастысты, техникумы
ахуырдзаутæ сæ ахуыргæнджытимæ цы диссаджы хæринæгтæ æрцæттæ кодтой, уыдонмæ.
Уый дын уырыссаг каравай, гуырдзиаг долмæ, тæтæйраг чак-чак, узбекаг шах-плов, кæсгон хычынтæ, нæхи ирон кæрдзынтæ, бæгæны, дзыкка, стæй ма, Ирыстоны цы адæмыхæттытæ цæры, уыдоны национ хæринæгтæ.
Æмбырдтæ аразæн залмæ бацæуæны та æрбынæттон сты нæ рес-
публикæйы национ-культурон æхсæнæдтæ, алкæмæндæр – хицæн фæз-
уат. Бæрæгбоны кадджын уазджытимæ – РЦИ-Аланийы Парламенты Сæрдар Тускъаты Таймураз. Бæрнонæй æрлæууыд алкæй раз дæр, уырыссæгты национ-культурон æхсæнад «Русь»-ы хъазахъхъæгты хор ма йын заргæ дæр акодта.
«Уастырджийы зарæг» райхъуыст сценæйæ. Нæ иудзинад æвдисæг «Симд»-ы бацыдысты фæсивæд. Уæрæсе æмæ Ирыстоны гимнтæм адæм хъуыстой лæугæйæ.
Фестивалы архайджытæ æмæ уазджытæн зæрдиаг арфæ ракодта
Тускъаты Таймураз.
– Ацы аз нæ уарзон Ирыстонæн хуымæтæг нæу, цалдæр кадджын юбилейы сбæрæг кодтам. Æнусты сæрты акæсгæйæ, мах кад кæнæм, ирон адæмæн стыр хæрзты чи бацыд, уыцы хистæртæн. Наукæйы, культурæйы, æфсæддон хъуыддаджы, царды алы къабазы уыдон цы бындур сæвæрдтой, уый руаджы республикæ абон æнтыстджын къахдзæфтæ кæны. Уыдон та къухы æфтынц нæ адæмты иумæйаг фæллойæ. Нæ хæлардзинад, нæ хорз æгъдæуттæ хъуамæ рæсугъдæй фæхæццæ кæнæм кæстæртæм, – загъта Парламенты Сæрдар æмæ арфæ ракодта фестиваль саразыны хъæппæрис равдисæг Æбиты Валери æмæ йе ’мкусджытæн.
Бæрæгбон сæ аив кафт æмæ зардæй барæсугъд кодтой Ирыстоны зындгонд артисттæ.
Гугкаты Жаннæ,
къамтæ систа Татьянæ ШЕХОДАНОВА
