РЦИ-Аланийы Хицауады Сæрдар Дзанайты Барис бабæрæг кодта республикæйы спортивон уагдæттæ. Йæ балц баст уыди, раздæр Хицауады æмбырды уыцы уагдæтты куыст фæхъомысджындæр кæнын æмæ йæ уæлдæр æмвæзадмæ сисыны тыххæй цы ахсджиаг ныхас цыди, уыимæ. Министрты кабинеты разамонæгимæ ма мадзалы архайдтой Цæгат Ирыстоны Хицауады Сæрдары хæдивæг Платы Альбинæ æмæ физикон культурæ æмæ спорты министры хæдивæг Санаты Аидæ.
Футболы спортивон скъола «Æвзонгдзинад»-ы дыууæ рады архайынц, 6-17 азы кæуыл цæуы, ахæм 900 сывæллоны, кусы дзы 50 адæймаджы. Ам Дзанайты Барис директор Гаджиты Иналимæ æрныхас кодта уагдоны æрвылбоны куыстыл. Лæмбынæг æркастысты, объект цы лæггæдтæ дæтты, уымæ, стæй йæ финансон-хæдзарадон уавæрмæ.
– Бæрæг у: спортивон скъола хъазуатон куыст кæны, æрыгон футболисттæ разæнгардæй цæуынц тренировкæтæм, сæ рæзтæн дæр сын ис хорз гæнæнтæ. Дарддæр дæр архайын хъæуы республикæйы футбол парахат кæныныл, уыимæ уæлæмхасæн фæрæзтæ æрбаздахыны куысты руаджы дæр, – бафиппайдта Дзанайты Барис.
Физкультурон-дзæбæхгæнæн комплекс «Ихын аренæ»-йы разамындæн премьер-министр бахæс кодта объекты æрвылбоны материалон-техникон уавæрмæ æмæ спортивон ифтонггæрзтæм цæст дарын. Ам дæр æркас-
тысты спорткомплексы финансон-хæдзарадон архайдмæ. Уæ зæрдыл уын æрлæууын кæндзыстæм: уагдоны бындурыл кусы, 109 адæймаджы кæм архайы, ахæм зымæгон спорты хуызты скъола.
Дзанайты Барис фæбæрæг кодта, сæйрагдæр кæй у регионы цæрджытæн физикон культурæ æмæ спорты архайынмæ нырыккон уавæртæ саразын. Уыцы ахсджиаг хъуыддагмæ иудадзыг йæ цæст дардзæн Цæгат Ирыстоны Физикон культурæ æмæ спорты министрад.
ГАПБАТЫ Алетæ
