Ацы бонты горæт Краснодары йæ куыст кодта дунеон хъæууонхæдзарадон равдыст «ЮГАГРО-2024». Уыцы мадзалы æнтыстджынæй архайдта куыстуат «Фат-Агро» (у компаниты къорд «Бавария»-йы дæлхайад).
Куыстуаты маркетолог Кадиты Аннæ куыд радзырдта, афтæмæй равдысты архайджытæн фенын кодтой сæ картофы хуызты ног селекцитæ. «Равдысты сарæзтам Цæгат Кавказы хæрзмыггаг культурты селекцион центры (йæ хъару азмæ у картофы 5 милуан губаччы бæрц) презентаци. Уыимæ, равдысты архайджытæ хорз аргъ скодтой нæхи селекцийы картофы ног хуызтæн. Уыдоны ’хсæн бæрæг дары картофы ног хуыз «Алани». Уый ныртæккæ ис паддзахадон фæлварæнты. Куыд нысан кæнæм, афтæмæй фидæн азы «Алани» дæр базарадмæ æрвитын райдайдзыстæм. Уымæй уæлдай, равдысты фæлгæты æмгуыстады фарстатыл æрдзырдтам егъау хъæууонхæдзарадон æмæ базарадон компаниты минæвæрттимæ дæр», – радзырдта Аннæ.
Зындгонд куыд у, афтæмæй æнæххæст бæрнондзинады æхсæнад «Фат-Агро» у егъаудæр цæгатирыстойнаг хъæууонхæдзарадон куыстуæттæй иу, кæны æфсирджын хортæ æмæ халсарты куыст. Компанийы бындурыл кусы Цæгат Кавказы хæрзмыггаг культурты селекцион центр.
Мæхъиты Фатимæ
