«Радуга», «Кисточка», «Хæзнадон» æмæ æндæртæ сты, хъæууон клубы цы къордтæ кусы, уыдон. Директор Кортиаты Жаннæ ныл æхсызгонæй сæмбæлд, ницы басусæг кодта, равдыста нын культурæйы артдзæсты бæстыхай, уæлдай зæрдæмæдзæугæ у æмбырдтæ аразæн зал, ис дзы 150 бынаты, фæлмæн бандæттæ, хорз сценæ.
Нывкæнынады студи, нырыккон кафты ансамбль, театралон æмæ вокалон къордтæм фæсивæд цæуынц æнæзивæгæй.
– Бирæ курдиатджын сабитæ нæм ис, кафынмæ, зарынмæ чи арæхсы, махæн та нæ хæс у сæ курдиат райхалын. Уый тыххæй та уарзын хъæуы сывæллæтты æмæ, цы куыст кæныс, уый, – зæгъы Жаннæ.
Æрвылаз Комсомольскы хæдахуыр артисттæ архайынц районы æмæ республикон фестивальты. Цæгат Ирыстоны Театралон архайджыты цæдис хуыздæрыл банымадта хъæууон клубы спектакль æмæ сын раттой Кады гæххæтт.
«Золушка», «Гуси-лебеди» æмæ æндæр равдыстытæм адæм æхсызгонæй бакæсынц. Кортиаты Жаннæ каст фæцис музыкалон педагогон училищæ, цæгъды цалдæр инструментыл.
– Ме стыр бæллиц у адæмон инструментты ансамбль сæмбырд кæнын, фæлæ ныртæккæ ницæмæй ифтонг стæм, – зæгъы клубы директор. Йæ ныхасмæ гæсгæ сын хъуымæцтæй баххуыс кæны Кировы районы Культурæйы галуан, йæ дæлха-йад сты. Æппæт костюмтæ, хъæугæ декорацитæ бацæттæ кæнынц ныййарджыты æххуысæй, кæддæриддæр сæ фарсмæ ис хъæуы хицау Аулохты Валери дæр.
Хорз уаид, Дзæуджы-хъæуæй сæм искуы куы æрласиккой ирон театры хъæлдзæг спектакль кæнæ зындгонд кафты ансамблы концерт, райхъуысид уæд клубæй фæндырдзагъд. Цы сæ нæ уадзы хъæумæ æрцæуын æмæ куклаты театр «Саби»-йы репертуаримæ хъæуккаг сывæллæтты базонгæ кæнын…
