Æдасдзинады федералон службæйы кусджытæ, сæрмагонд оперативон-агурæн мадзæлттæ саразгæйæ, кæрон сæвæрдтой Æрæфы районы Советон хъæууон цæрæн бынаты специалисты æнæзакъон архайдæн.
Слестгæнджытæ муниципалитеты кусæг сылгоймаджы азымджын кæнынц, бынæттон администрацийы бæрны уæвæг зæххы хæйттæ æнæзакъонæй йæхи кæй бакодта, уымæй.
Оперативон кусджыты бæрæггæнæнтæм гæсгæ, 1961 азы гуырд гуырысхойаг, барадон бындур ын нæ уыд, афтæмæй йæхимæ райста хъæуы администрацийы сæргълæууæджы (уый рæстæгмæ куысты нæ уыд) æххæстбартæ. Уыцы æууæлæй спайда кæнгæйæ, гуырысхойаг мæнг бæрæггæнæнтæ бахаста администрацийы документтæм æмæ уыдоны бындурыл «Росреестр»-ы цæгатирыстойнаг управленимæ курдиат балæвæрдта, цæмæй йыл уыцы зæххытæ сфидар кæной. Афтæмæй сылгоймаг баци амынд зæххы хæйтты хицау.
Йæ æнæзакъон архайдæй гуырысхойаг Æрæфы районы администрацийæн ракодта 800 мин сомы аргъ зиан.
Æппæт æмбырдгонд æрмæджыты бындурыл Æдасдзинады федералон службæйы регионалон управленийы слестгæнджытæ УФ-йы Уголовон кодексы 159-æм статьяйы 3-æм хаймæ («Куысты бынатæй спайда кæнгæйæ, цæстфæливæн митæ саразын») гæсгæ гуырысхойаджы ныхмæ сарæзтой уголовон хъуыддаг.
Æдасдзинады
федералон службæйы РЦИ-Аланийы
управленийы
пресс-службæ
