Махмæ алцыдæр диссаг цæмæн кæсы? Уымæн æмæ æппæт хъуыддæгтæ баст сты мыздимæ, пенсиимæ.
Кæсын, æмæ, дам, Вагановайы номыл Уырыссаг балеты академийы ректор, Уæрæсейы адæмон артист Николай Цискаридзе театртæм билетты æргъты тыххæй загъта йæ фиппаинæгтæ.
Ома, иуæй-иу билеты аргъ свæййы адæймаджы мызды бæрц. «Кæддæриддæр театрмæ билет балхæнын зын уыд, фæлæ хъуамæ йæ аргъ цæнгæт хиды аргъ ма уа. Æз уыимæ разы нæ дæн. Спектакльмæ бацæуыны аргъ хъуамæ адæймаджы мызды бæрц ма уа. Уым цыдæр æнахъинон митæ æмбæхст сты», – зæгъы Николай Цискаридзе.
Театры зал хъуамæ афтид ма уа, фæлæ адæммæ æхца фаг нæй. Уый – Мæскуыйы. Ныр та иннæ ахæм цау. Стыр театры, ногазон балет «Щелкунчик»-мæ цыппар билеты ауæй кодтой 1 милуан æмæ 255 мин сомæй. Балет уыдзæн 28 декабры, 19 сахатыл. Билеттæ рахастой уæйкæныны фæзмæ.
Айразмæ, нæхимæ цæугæйæ, амбæлдтæн мæ рагон зонгæйыл, ныхас ныхасы фæстæ… Радзырдта мын, мæ сыхæгтæ, дам, мæ хуыдтой Дзæуджы-
хъæуы, Вахтанговы хæдзар-музейы цавæрдæр спектакльмæ. Фæрсгæ дæр нал акодтон, цы хуыйны, зæгъгæ. Аргъ мын куы загъта, уæд мæ уый дæр айрох. Билеты аргъ кодта 10 мин сомы. Махæй кæмæ ис 10 мин уæлдай сомтæ æмæ ахæм спектакльтæм цæуæм?
Кæмæдæр, дам, уыд æмæ йæ фыды фыдæн дæр дугъ уагъта. Уый та уын ногазон «Щелкунчик»!
