Мæздæджы Сывæллæтты аивадон скъолайы хъомылгæнинæгты куыстыты равдыст байгом Бетъырбухы Свято-Троицкий Александр Невскийы лаврæйы монон-рухстауæг центр «Святодуховский»-ы. Баст у чырыстон дины темæйыл куыстытимæ. Цæуы фыццаг хатт, ахæсдзæн январы æмбисмæ. Равдыст зынгæ цау у канд мæздæггæгты нæ, фæлæ республикæйы культурон царды дæр.
Цыппурсы темæ хуымæтæджы нæ равзæрстой йæ саразджытæ, адæм æй зонынц æмæ уарзынц, уæрæх æй бæрæг кæнынц бинонты ‘хсæн. Ног фæлтæры аивадон ахуырад æмæ монон хъомыладæн егъау нысаниуæг ис нырыккон царды, фæсивæды кæны разæнгарддæр, рæзынц хæрзæгъдау æмæ патриоттæй. Равдыст байгом кадджын уавæры, архайдтой дзы Бетъырбух æмæ Мæздæджы дины кусджытæ – епископ Кронштатский Вениамин æмæ Мæздæджы аргъуанты зылды протоиерей Артемий Понамаренко. Мæздæджы районы администрацийы сæргълæууæг Гутнаты Геннадийы номæй равдыст саразджытæ æмæ йæ архайджытæн раарфæ кодта районы культурæйы фарстаты фæдыл хайады хицау Юлия Потоцкая:
– Арфæ кæнын, абон ам цы егъау бæрæгбон байгом, уый саразджытæн. Нæ аивадон скъола у рагондæртæй иу, æнусы ‘рдæгæй дзы фылдæр ахуыргæнджытæ архайынц сæ хъомылгæнинæгты æрдзæй лæвæрд курдиат гом кæнын, фадат сын дæттынц аивады бæрзæндтæм схизынæн, – аивæдты скъолайы истори æмæ царды тыххæй рав-
дысты архайджыты базонгæ кодта хайады хицау, лæварæн æрбаласта Мæздæ-
джы тыххæй чингуытæ æмæ зæрдылдарæн лæвæрттæ. Сæ хъомылгæнинæгтæй иу – Уæрæсейы Нывгæнджыты цæдисы уæнг, цæгатаг столицæйы хъуыстгонд нывгæнæг æмæ аивадиртасæг Анатолий Анненков. Равдыст саразыны фæндон дæр уый бахаста, йæ саразын дæр ын бантыст. Ацы бонты цæгатаг столицæйы ис, Мæздæджы Сывæллæтты аивадон скъола æмцег кæимæ кæны, уыцы Стъараполы крайы станицæ Курскаяйы Сывæллæтты аивадон скъолайы ахуыргæнæг Маринæ Цопарь. Стыр аргъ скодта сывæллæтты нывтæн, бафиппайдта, бæрзонд æмвæзадыл фыст кæй сты, уый.
Сывæллæтты куыстытæ йæ зæрдæмæ арф айс-та Бетъырбухы епархийы викарий Вениамин дæр.
Аргъуаны цур центры арæх фæцæуынц зындгонд нывгæнджыты равдыстытæ, ныр дзы фыццаг хатт байгом сывæллæтты куыстыты равдыст. Æдзух æнæвдæлон викарий ссардта рæстæг равдысты архайынмæ æмæ разыйæ баззад æрыгон мæздæггаг нывгæнджыты сфæлдыстадæй.
– Иунæг хатт уыдтæн Мæздæджы, фæлæ мын, хъыгагæн, аивадон скъола бабæрæг кæнын нæ бантыст. Зæрдæйæн æхцондзинад хæссынц сывæллæтты конд цымыдисаг нывтæ. Арæх нæм вæййынц равдыстытæ, ацы хатт дзы сывæллæтты нывтæ кæй равæрдтой, уый уæлдай æхсызгон у, – бафиппайдта епископ.
Йæ фæндонмæ гæсгæ, фидæны дæр цæгатирыстойнаг сывæллæтты нывты равдыстытæ арæзт цæудзысты. Хæстæгдæр равдыст нысан кæнынц, мæздæггаг Мады-Майрæмы дзуары нывты республикон конкурсмæ Ирыстоны алы рæттæй цы куыстытæ ‘рбарвыстой, уыдоны, уый фæстæ та Александр Невскийы номыл республикон конкурсы нывты равдыстытæ саразын. Чи байгом, уыцы равдыст та цæудзæн Цыппурс æмæ Ног азы бæрæгбæттæ, ахæсдзæн январы æмбисмæ. Бæрæгбæтты архайдзысты горæты цæрджытæ, стæй йæ уазджытæ. Равдыст фенын æмæ сывæллæтты куыстытæн аргъ скæнынæн сын уыдзæн фадат.
ХУЫБИАТЫ Ларисæ, къам систа
Юлия ПОТОЦКАЯ
