Ивгъуыд азы кæрон, бæлвырддæр зæгъгæйæ та 2024 азы 19 декабры Уæрæсейы Президентæн æрвылазон комкоммæ бастдзинад куы уыдис нæ бæстæйы цæрджытимæ, уæд æм лæвæрд æрцыд 2,5 милан фарстайы æмæ хъусынгæнинагæй фылдæр. Цæгат Ирыстоны цæрджытæй дæр разынд, нæ паддзахады Сæргълæууæгмæ æргом фарст чи балæвæрдта, ахæмтæ. Сæ иу – Агънаты Хъауырбег, æхсæнадон архайæг.
Æвæццæгæн, ам «фарст» куы зæгъæм, уæд бынтон раст нæ уыдзæн, «курдиат» ыл хуыздæр сфидаудзæн:. «Уæрæсейы Федерацийы 68-æм статья куыд зæгъы, афтæмæй Уæрæсейы паддзахадон æвзаг у уырыссаг, куыд паддзахадаразæг (государствообразующий). Гъе, уый тыххæй, абоны уавæртæ хынцгæйæ, бынтон æнæзакъоныл нымайын дуканиты, салонты, алыхуызон центрты нæмттæ англисаг æвзагыл фыст кæй сты, уый. Курын дæ, Владимир Владимиры фырт, цæмæй дæ бар-
дзырдмæ гæсгæ Паддзахадон Думæ кæнæ Федерацийы Советмæ хаст æрцæуа Уæрæсейы фæзуаты англисаг æвзагæй ахæм фыстытæй мауал пайда кæныны тыххæй закъон».
Бæрæггонд куыд у, афтæмæй уыцы низ схæцыд нæ бæстæйы алы горæт нæ, фæлæ ма хъæутыл дæр. Зæгъæм, нæ Райгуырæн бæстæйы сæйраг горæт Мæскуыйы æрмæстдæр алы цыппæрæймаг вывескæ фыст у уырыссагау. Уый фæдыл зындгонд журналист Юрий Пронько афтæ фыссы: «Спортæй архайын, йæ ном англисаг æвзагыл фыст кæмæн у, ахæм тренировкæтæгæнæн центры. Йæ фарсмæ йын цы агъуыст аразы клуб, уымæн ныридæгæн ис англисаг æвзагыл фыст вывескæ, йæ бакомкоммæ – къофицымæн, йæ ном – англисаг æвзагыл фыст. Æрмæстдæр йæ фарсмæ лæууæг «Стъæлф» («Точка») у уырыссаг, фæлæ æз ахæм хæринаг нæ хæрын. А изæр мæм ныффыстой, уый, дам, базар у, ома, базарадон ахастдзинæдтæ (рынок). Адæмы нæ фæнды цæрын, Огонек, зæгъгæ, ахæм хъæуы, фæнды сæ цæрын Огонек Village-йы. Уый æвзаг нæ зонын у æви æдылыдзинад? Уырыссаг æвзагмæ ма дзырд village стæлмац кæнут – «хъæу», («деревня»). Æви сæ хъустæн æхцондæр у англисаг дзырд? Ома, æз кæсын Капотня Daily, новости Капотни» нæ, фæлæ? Уый гуымирыдзинад, хуырымдзинад у!»
Фæлæ раздæхæм Агънаты Хъауырбеджы курдиатмæ. Дзуапмæ æнхъæлмæ кæсын æй бирæ рæстæг нæ бахъуыд. «Государственная Дума в приоритетном порядке рассмотрит законопроект о защите русского языка, который предусматривает размещение вывесок и надписей только на русском языке», – ахæм уыд Паддзахадон Думæйы Сæрдар Вячеслав Володины дзуапп.
«Рæстдзинад» иу æмæ дыууæ хатты нæ фыста, нæ Ирыстоны горæттæ æмæ хъæутæ дæр ацы «низы» ахæсты кæй фесты, уый тыххæй. Хъыгагæн нæм,заводтæ æмæ фабриктæн, зæгъын æмбæлы, сæ кой дæр нал ис, искуы иуæй æндæр. Фæлæ уый хыгъд – дуканитæ, алыхуызы салонтæ, артаг уæйгæнæн куыстуæттæ æмæ афтектæ. Амалхъомтæн – бузныг, уыдоны руаджы, нæ намысджын поэты загъдау, «бæгънæг-бæгъæввад, ыстонг, уысмæн над» не стæм. Балхæнынæн алкæмæн йæ уавæртæ æмхуызон кæй не сты, ууыл дæр нæу нæ ныхас. Фæлæ амалхъомтæ тынг уарзынц не знæгты æвзаг – сæ бæстыхæйтты нæмттæ фыст сты англисагау. Æмæ нæм искæцæй уазджытæ куы ссæуы (фæстаг къорд азы туристтæн ныккæнæн дæр нал ис), уæд дисы бацæуынц, кавказаг республикæйы сты, ууыл сдызæрдыг вæййынц. Иу ирон дзырд дæр, æхсæнадон транспорты æрлæууæнтæ ма нымай, афтæмæй, хæснагæн дæр не ссардзынæ. Нæ сæр бæрзæндты цы проспектæй хæссæм, уазджыты къæхты бын чи фæци, уым фенæн ис æрмæстдæр иунæг иронау фыст дзырд – «хилдасæн»… Республикæ Цæгат Ирыстон-Аланийы Конституцийы (фидаргонд æрцыд 1994 азы 12 ноябры)15-æм статьяйы 1-æм пункты загъд ис: «Республикæ Цæгат Ирыс-
тон-Аланийы паддзахадон æвзæгтæ сты ирон æмæ уырыссаг». 2-æм пункт: «Ирон æвзаг (ирон æмæ дыгурон диалекттæ) у ирон адæмы национ хиæмбарынады бындур. Ирон æвзаг бахъахъхъæнын у Республикæ Цæгат Ирыстон-Аланийы паддзахадон хицаудзинады сæйрагдæр хæстæй иу». 3-æм пункт: «Республикæ Цæгат Ирыстон-Аланийы фæзуаты цæрæг адæмæн ис бар се ‘взаг бахъахъхъæныны, йæ сахуыр кæнынæн уавæртæ аразыны бар».
Иу хъуыддаг – æппæт уыцы рæсугъд мидисджын ныхæстæ – Конституцийы ныффыссын, иннæ хъуыддаг та – сæ æххæст кæнын. Бауырнæд уæ, нæ тæрхоны лæгтæй бирæтæ сæ мадæлон æвзаг, ирон уæвгæйæ, зонгæ дæр нæ кæнынц, кæд æмæ сæ комкоммæ хæс йæ бахъахъхъæнын у, уæд. Стæм хатт сæм телеуынынады куы фæкæсын, уæд мæ зæрдæ бамæгуыр вæййы, кæуын мæм æрцæуы – сæ хъуы-
дытæ адæмы размæ сæ бон рахæссын нæ вæййы – къуымых, гæвзыкк æвзагæй цыдæртæ фæмыхъхъ-мыхъхъ кæнынц, уырыссагмæ рахизынц.
Уый фæдыл ма мæ ам фæнды Уæрæсейы Федерацийы Конституцимæ дæр газеткæсджыты æргом аздахын. Нæ паддзахады сæйраг нормативон барадон акты фыццаг статьяйы æвдæм пункт нын зæгъы: «Уæрæсейы Федерацийы паддзахадон æвзагæй æнæмæнг пайда кæнын афтæ æмбаргæ нæу, Уæрæсейы Федерацийы республикæтæ, æмæ дзы цы адæм цæры, уыдоны паддзахадон æвзагæй пайда кæныны бар сын нæй, кæнæ та сын уыцы бар дæлазæг, ныллæгдæргонд у». Уый афтæ æмбарын хъæуы, æмæ паддзахадон уырыссаг, æмæ нæ республикæйы паддзахадон ирон æвзаг ам, Цæгат Ирыстоны, æмсæр сты. Уый – гæххæттыл. Нæ царды æцæгдзинад та – бынтон æндæрхуызон…
ГАПБАТЫ Алетæ