Дзæуджыхъæуы ФК «Алани» ивгъуыд сабаты Грознайы Султан Билимхановы номыл стадионы Уæрæсейы Фыццаг къорды чемпионаты 25-æм туры фембæлд Саратовы командæ «Сокол»-имæ.
Дзæуджыхъæуы командæйы рæнхъыты фембæлды архайдтой: №23 – Георгий Натабашвили, №19 – Бутаты Аллон, №70 – Дауыраты Руслан, №58 – Ышык Мурат (90’+5’ – Биазырты Алан), №12 – Дмитрий Казанцев, №173 – Макар Чирков, №79 – Чертыхъоты Дато (60’ – Хъæцмæзты Сослан), №8 – Хуыгаты Алан, №21 – Кодзырты Артур (65’ – Гогниты Руслан), №9 – Артем Закиров, №76 – Виктор Нафиков (90’+5’ – Дудайты Инал).
«Алани»-йы хъазджытæ фæзмæ æрмæстдæр рамбулыныл зондимæ кæй рацыдысты, уый бæрæг уыд, фембæлды фыццаг минутты размæ кæй атын-дзыдтой, уымæй, фæлæ дæсæм минутыл хъазты цыд æндæр гаччы абадт. Уыцы минутыл «Сокол»-ы хъазджытæ æвиппайды ныббырст ацарæзтой, æмæ сын уый пайдайы хос фæци.
Уазджыты хъазæг пуртиимæ «Алани»-йы дуаргæс Георгий Натабашвилиймæ иуæй-иумæ куы бабырста, уæд, уый уромгæйæ, Дауыраты Руслан рæдыд æруагъта æмæ йæ тæрхонгæнæг фæзæй рарвыста. Ноджы ма «Алани» иваргонд æрцыд
11-метрон цæфæй. Ахæм уавæры тынг сæрæнæй йæхи равдыста дуаргæс Георгий Натабашвили æмæ пурти дуары батæхын нæ бауагъта.
«Алани» иу хъазæг къаддæрæй кæй баззад, уый йæ хъазджытæй домдта сæхи ноджы фæразондæрæй равдисын. Уымæй уæлдай ма сæ хъуыди къæрцхъусдæр уæвын, сæ иварон фæзмæ бацæуæнтæ хъахъхъæнгæйæ.
«Сокол», нымæцæй фылдæр уæвгæйæ фæныфсджындæр, æмæ йæ хъазджытæ размæ арæхдæр бырсын райдыдтой. Уыцы ныббырстытæй 24’-æм минутыл сæ размæбырсæг Виктор Ковачевич йе ’мбæлтты ныббырстæн скодта хъæугæ кæронбæттæн æмæ пурти «Алани»-йы дуары фæмидæг кодта. «Сокол» размæ рацыд 0:1-æй. Алайнæгтæн ацы уавæр сæ ныфс нæ асаста æмæ æппæт тыхтæй дæр архайдтой хъазты цыд сæхи пайдайæн рацаразыныл.
39’-æм минутыл алайнæгтæ цы ныббырст сарæзтой, уым йæ уавæрæй иттæг хорз спайда кодта Хуыгаты Алан, æмæ йæ æнæрæдигæ цæфы фæстæ хыгъд ссис 1:1.
Дыккаг таймы дæр пурти кæд фылдæр рæстæг саратовæгтæм уыди, уæддæр фысымтыл нымад-уæвæг алайнæгтæ къорд хатты тæссаг уавæртæ сарæзтой уазджыты иварон фæзмæ бацæуæнты.
88’-æм минутыл «Сокол»-ы хъазджытæ, алайнæгты ныббырст уромгæйæ, пурти фæзæй сæ дуары фæстæмæ куы ракъуырдтой, уæд иттæг рæсугъд рауад нæ командæйы æрбалæвæрд. «Сокол»-ы хъазджытæ кæд иууылдæр сæ иварон фæзы æртыгуыр сты, уæддæр сæ уый нæ бахъахъхъæдта фыдбылызæй. «Алани»-йы размæбырсæг Виктор Нафиков тынг хорз æрбалæвæрдта пурти къуымонæй. Уым Арсен Закиров йæ сæрæй пурти фæцарæзта Гогниты Русланы ’рдæм, æмæ йæ уый «Сокол»-ы дуаргæсы фæрсты хызыл сæмбæлын кодта. Хыгъд ссис 2:1 «Алани»-йы пайдайæн æмæ афтæмæй баззад хъазты кæронмæ.
Уæлахиз «Алани»-йæн уыди ацы азы фыццаг æнтыст, æмæ ма, чемпионаты кæронмæ æппынкъаддæр фондз хатты куыд рамбула, уый йын зæгъы футболуарзджыты зæрдæ!
Ацы уæлахизы фæстæ «Алани» турнирон таблицæйы схызт иу къæпхæн уæлдæр, фæлæ, ууыл æрлæууæн кæй нæй, уый æмбарынц нæ командæйы разамонджытæ æмæ хъазджытæ. Чемпионаты кæронмæ ма цы аст фембæлды баззад, уыдоны бахъæудзæн æппæт тыхтæй дæр бацархайын æмæ ма дзы æппынкъаддæр 10-12 очкойы рамбулын. Æрмæстдæр ахæм бæрæггæнæнтимæ ис зæрдæ дарæн Фыццаг къорды (ФНЛ) чемпионаты баззайынæн.
«Алани» йæ радон, 26-æм туры фембæлдзæн 29 мартъийы уазæгуаты Новороссийскы «Черноморец»-имæ.
Баскаты Уырызмæг
