Ирыстоныл та æхсызгон хабар сæмбæлд. Ирон лæппу сси скрипкæйыл цæгъдынæй дунеон конкурсы уæлахиз-дзау. Зындгонд скрипкæйыл цæгъдæг, солист-концертмейстер æмæ Бетъырбухы губернаторон оркестры музыкалон разамонæг Тадтаты Григори сси дунеон конкурс «OneSong competition»-ы лауреат Тайваны.
Ацы конкурсæн дунеон культурон царды стыр ахадындзинад кæй ис, уый бæрæг уыд, жюрийы чи бадтис, уыдонæй дæр. Жюрийы уæнгтæ уыдысты Къаролы ус Елизаветæйы конкурсы лауреаттæ Китай, Америкæ, Австрали æмæ Европæйы алы бæстæтæй. Конкурс арæзт цыд цыппар хайæ.
Григори райгуырд Бетъырбухы. Æхсæз азы йыл куы цыд, уæд райдыдта скрипкæйыл ахуыр кæнын. 2002 азы ахуыр кæнынмæ бацыд, Бетъырбухы Римский-Корсаковы номыл консерваторийы цы сæрмагонд музыкалон скъола ис, уырдæм. Йæ ахуыргæнæг уыд зындгонд педагог Верæ Добрынина. 2007 азæй йæ фæуыны онг та ахуыр кодта Аннæ Ореховамæ. 2010 азы бацыд Бетъырбухы Римский-Корсаковы номыл консерваторимæ профессор Александр Стангы къласмæ. 2015 азы сси Петр Чайковскийы номыл Мæскуыйы паддзахадон консерваторийы аспирант профессор Эдуард Грачы къласы.
Григори архайдта мастер-классты: профессортæ Захар Брон, Лазарь Розенберг, Борис Кушнир, Филипп Драганов, Михаил Гантварга, Максим Федотов, Роман Нодель æмæ Борис Белкинимæ.
Æрыгон музыкант æнтыстджынæй архайы алыхуызон музыкалон конкурстæ æмæ фестивальты: у æрыгон музыкантты дунеон конкурсы 3-æм премийы лауреат Тольяттийы, конкурс «Gartow Stiftung Wettbewerb»-ы дипломант æмæ афтæ дарддæр. Григорийæн концерттæ уыд Уæрæсейы, Америкæйы, Италийы, Данийы, Францы, Японы, Эстонийы, Швейцарийы æмæ æндæр бæстæты. 2013 азæй нырмæ, 2008 азы уæззау цауты фæдыл, Григори концерттæ саразы Хуссар Ирыстоны æмæ дзы йæхæдæг дæр зæрдиагæй фæархайы. Цæгат Кавказы республикæты фæсивæды культурон рæзтмæ зынгæ æвæрæн кæй бахаста, уый тыххæй Григори хорзæхджын æрцыд Кады гæххæттытæй республикæты разамындæй.
Григори у Бетъырбухы бæрзонд профессионалон æмæ ирддæр æрыгон музыкалон коллектив «Клевер-Квартет»-ы архайæг. Гастрольты вæййынц канд нæ бæстæйы горæтты нæ, фæлæ фæсарæнты дæр. Ноджы ма йын æнгом æмгуыстад ис ахæм зындгонд музыканттимæ, куыд Светланæ Сурганова, Александр Сокуров, композитор Мурат Кабардоков æмæ иннæтæ.
Ныртæккæ Григори у горæт Маастрихты консерваторийы студент. Разамынд ын дæтты профессор Борис Белкин.
– Бирæтæ афтæ хъуыды кæнынц, æмæ музыкант уæвын æнцон у – рухс сценæ, къухæм-дзæгъд æмæ афтæ дарддæр. Фæлæ уый афтæ нæу. Цæмæй æнтыстджын музыкант суай, уый тыххæй хъæуы бирæ фыдæбон кæнын, æрдзон курдиат æмæ фидар удыхъæд, – зæгъы Григори.
Нæ зæрдæ йын зæгъы ноджы стырдæр æнтыстдзинæдтæ!
