Парсиаты Руслан райгуырдис Дзуарыхъæуы. Хъомыл кодта хуымæтæг хъæуккаг бинонты ’хсæн. Йæ ныййарджыты фæрцы бауарзта, ныртæккæ йæ царды зынгæ бынат цы дæсныйад ахсы, уый. Саби ма куы уыдис, уæд уыдта, сæ бинонтæ бирæ фос кæй дарынц, уый. Йæ ныййарджытæ фосмæ æдзухдæр тынг хорз зылдысты, куыд æмбæлы, афтæ сæм кастысты. Уыдис сæм алыхуызон хæдзарон мæргътæ, дардтой тæрхъустæ, бæхтæ, фыстæ.
Фæстæдæр ма сæм мыдыбындзытæ дæр бафтыд. Лæппу уыдта, фосимæ архайын æнцон кæй нæу, уый, хъæуы дзы бирæ фæллой кæнын. Фæлæ, уæддæр, куы бахъомыл, уæд, цæмæдæр гæсгæ, бацыд Хæххон аграрон университеты ветеринарон факультетмæ.
– Æгомыг фосæн, дзурын чи нæ зоны, цы мæ риссы, зæгъгæ, уыдонæн мæ бон баххуыс кæнын куы уа, уæд ма уымæй хуыздæр цы ис, – зæгъы Руслан.
Ахæм хъуыдыимæ ныридæгæн лæппу æнтыстджынæй ахуыр кæны 5-æм курсы. Университеты студенттæн цы уавæртæ ис, уыдон абон Русланæн фадат дæттынц практикон фæлтæрæнтæ æххæст кæнынæн. Уыимæ, фосыл аудын кæй уарзы, уый фæрцы зын-дзинæдтæ йæ дæсныйады æппындæр нæ уыны. Зæгъæм, фыццаг хатт цы операци скодта, уый дæр хорз хъуыды кæны. Æртыккæгæм курсы ахуыр кодта уæд. Теоримæ гæсгæ, студенттæн амыдтой цымыдисаг æрмæг – ветеринарон хирурги. Уыцы рæстæг Русланæн фæрынчын сæ куыдз. Лæппу абон хорз нал хъуыды кæны, цыппæркъахыг цы кодта, уый. Фæлæ йын операци кæй бахъуыдис кæнын, уый бæлвырд бæрæг уыдис. Зыр-зыргæнгæ, зæрдæ та – тæпп-тæпгæнгæ, афтæмæй хъуыддаг кæронмæ конд æрцыд æмæ куыдз фервæзт. Цалдæр боны фæстæ та бахъуыдис сыхæгты хъугæн йæ къæдзил бахуыйын. Рауадис ын. Афтæмæй лæппу фæныфсджындæр.
Ныртæккæ Руслан фылдæр рæстæг æрвиты университеты, кæны практикæ лабораторийы. Фæсахуыр та цæуы Мариинаг театры РЦИ-Аланийы хайадмæ, Дзанайты Ольгæйы зарæггæнджыты къордмæ. Дзуарыхъæуккаг лæппу йæ сабибонтæй нырмæ уарзы ирон музыкæ, уæлдайдæр та хъисын фæндыры зæлтæ. Рагæй йæ фæндыдис ацы инструментыл цæгъдын сахуыр кæнын, фæлæ йæ йæ бон балхæнын кæй нæ уыдис, уый тыххæй йæ размæ ног нысан сæвæрдта: цыбыр рæстæгмæ хи къухæй хъисын фæндыр саразын. Иуахæмы бацыдис йе ’рвадæлтæм. Йæ цæрæнбон бирæ Узегаты Тамерланæн, лæппу йын йæхи куы бацамыдта, уæд ын уый хъисын фæндыр саразыны æппæт сусæгдзинæдтæ дæр раргом кодта.
Фыццаг рæстæг бирæ зындзинæдтимæ сæмбæлд лæппу. Ахуыр дæр кодта æмæ ма хъисын фæндыр саразыныл дæр архайдта, фæлæ йын ницы æнтыст. Адæймаг – фæндтæгæнæг, хъысмæт – Хуыцауаразæг, зæгъгæ, дзæгъæлы нæ фæзæгъынц. Ахæм у Русланы цардвæндаг дæр. Лæппу хъисын фæндыр рæстæгмæ ферох кодта, фæлæ йæ инструмент та, цыма, рох кæнынмæ нæ хъавыд… Цалдæр азы фæстæ Русланæн йæ зæрдæ æхсайын райдыдта инструментмæ æмæ цыбыр рæстæгмæ йæхи къухæй сарæзта хъисын фæндыр. Бахъуыдис æй хуымæтæг мигæнæнтæ æмæ дзаумæттæ: æхсырысæрты къопп, фæйнæг æмæ хирурджы æндæхтæ. Иумæ сæ баиу кодта, æмæ йын сзарыдысты. Фæстæдæр та райдыдта, куыд æмбæлы, афтæ, нæ фыдæлтæ цæмæй арæзтой, ахæм æрмæгæй кусын. Ныридæгæн Русланмæ ис дыууадæстæнонтæ, дала, стæй цалдæр хъисын фæндыры.
Парсиаты Руслан кæд зондахастæй ветеринарон дохтыр у, уæд зæрдæйæ та у аивадмæ æмхиц адæймаг. Лæппу дарддæр дохтырæй кусдзæн, фæлæ, кæддæр йæ зæрдæйыл цы хъисын фæндыры зæлтæ андзæвыдысты, уыдоныл дæр йæхи никуы сивдзæн.
Къутæрты Аидæ
