Цæгат Ирыстоны Национ музейы байгом Уæрæсейы Нывгæнджыты цæдисы уæнг Кънаттаты-Алиханты Аминæйы нывты равдыст. Æдæппæтæй аивадуарзджыты рæгъмæ рахаста кæттагыл нывгонд 89 нывы. Автор спайда кодта техникæйы алы хуызтæй.
Æрыгон нывгæнæгæн уæлдай уарзон æмæ зæрдæмæдзæугæ сты сылгойма-джы фæлгонцтæ. Аминæ равдыста кавказаг чызджыты аивдзинад æмæ рæсугъд-дзинад, Цæгат Ирыстоны хæххон æрдзы нывтæ, суанг ма африкæйаг сылгоймæгты хæдхуыздзинад æмæ сæ фæлыст.
Ацы равдыст Аминæ бацæттæ кодта йæ райгуырды 35 азы юбилеймæ. Байгом æй кодта РЦИ-Аланийы культурæйы министры фыццаг хæдивæг Рæмонты Маринæ.
– Ацы равдысты мах уынæм æрыгон, фæлæ курдиатджын нывгæнæджы уарзондзинад, адæймагæн зæххыл рæсугъд-дæр æмæ зынаргъдæр цы у, уыдонмæ: Фыдыбæстæ æмæ аивадмæ. Фæнды мæ Аминæйæн ахæм арфæ ракæнын, цæмæй йæ миддунейы уыцы хорздзинад æмæ уарзондзинад бахъахъхъæна æмæ йæ ма фесафа, æмæ йæ дарддæр дæр йе сфæлдыстадимæ адæмыл уара, – загъта Маринæ.
Министры хæдивæг бузныг загъта РЦИ-Аланийы Национ музейы генералон директор Цуциты Асланæн, фæлтæрты ’хсæн бастдзинад фидардæр кæныныл зæрдиагæй кæй архайы, аивады хуыздæр традицитæ кæй хъахъхъæны æмæ фæсивæдæн се сфæлдыстадон фæндагыл кæй æххуыс кæны, уый тыххæй.
Цалдæр ныхасы йæ ахуырдзауы тыххæй загъта педагог, Уæрæсейы Федерацийы адæмон нывгæнæг Челæхсаты Магрез дæр. Уый фæбæрæг кодта, автор стыр курдиаты хицау кæй у, йæ тырнындзинад, ахуыры дæр иттæг хорз бæрæггæнæнтæ кæй æвдыста.
Кънаттаты-Алиханты Аминæйы ахуыргонддзинад, дунейы аивад хорз кæй зоны, уый фæнысан кодта йæ иннæ педагог, Уæрæсейы Федерацийы сгуыхт нывгæнæг, Цæгат Ирыстоны Хетæгкаты Къостайы номыл паддзахадон университеты аивæдты факультеты нывкæнынады аивады кафедрæйы профессор Джыккайты Мурат дæр.
Æрыгон нывгæнæгæн ма арфæ ракодтой горæт Ялтæйы сæйраг архитектор, Хъырымы ирон æхсæнады сæрдар Саулаты Валери æмæ Дзæуджыхъæуы 7-æм скъолайы директор Къорнаты Татьянæ.
Аминæ нывтæ кæнын райдыдта, фараст азы йыл куы цыд, уæд. Ахуыр кодта аивадон студийы, уый фæстæ каст фæци Тауаситы Сослæнбеджы номыл Аивæдты скъола æмæ Дзæуджыхъæуы Дзанайты Азанбеджы номыл Аивæдты училищæ, уый фæстæ та – ЦИПУ-йы аивæдты факультет.
Нæ редакцийы номæй йын мах дæр зæрдиаг арфæ кæнæм. Æхсызгонæй æнхъæлмæ кæсдзыстæм йæ ног сфæлдыстадон æнтыстдзинæдтæм.
