Æрæджы Дзæуджыхъæуы, Цоколайы-фырты номыл уынджы спортивон цæттæгæнæн центры уыдис РЦИ-Аланийы чемпионат уæгъдибар хъæбысхæстæй.
Ерысты цы 165 богалы архайдтой, уыдоны ’хсæн нæ уыдысты нæ абоны зындгонддæр спортсментæ: Сидахъаты Зауырбег, Найфонты Артур, Байаты Давид æмæ ма цалдæр дунеон къласы спорты мастертæ. Зауырбег, Артур æмæ Давид сæхи цæттæ кодтой, ацы бонты Словакийы сæйраг горæт Братиславæйы чи райдайдзæн, уыцы Европæйы чемпионатмæ.
Кæй зæгъын æй хъæуы, кæй ранымадтам, уыдон, æмæ ма, Уæрæсейы иугонд командæимæ цæттæгæнæн æмбырды цы къорд ирыстойнаг богалы уыди, уыдонимæ республикæйы чемпионат цымыдисагдæр рауадаид, фæлæ уæддæр, ерысты цæмæ бакæсай, уый гыццыл нæ уыд.
Уæрæсейы сгуыхт тренер, педагогон наукæйы кандидат, дунеон категорийы тæрхонгæнæг Багаты Славик уый тыххæй загъта: «Бæргæ, нæ тыхджындæр спортсментæн се ’ппæтæн дæр фадат куы уыдаид ерысты архайынæн, уæд нæ ерыстæ зынгæ хуызджындæр æмæ цымыдисагдæр уыдаиккой. Зæгъын хъæуы уый дæр, æмæ нæ хъæбысхæсты ацы кары фаг нæй, дунеон къласы æмвæз чи у, ахæм богæлттæ. Мах кæд хъæбысхæсты республикæ хонынц, уæд нæм хъуамæ фылдæр уа амæй-ай тыхджындæр богæлттæ алы уæзы дæр. Дысфæлдæхтæй нæ бавналын хъæуы нæ хъæбысхæсты скъолайы куыст ноджы тыхджындæр рацаразынмæ. Бафæзмын хъæуы, 1990 азты Фадзайты Арсен йе ’мбæлттимæ цы уавæртæ сарæзта æмæ, уыдоны фæрцы цы сгуыхтдзинæдтæ равдыстой нæ хъомылгæнинæгтæ, уыцы дæнцæг. Æнæмæнг, абон нæ хъæбысхæсты скъола у æххуысхъуаг. Кæй зæгъын æй хъæуы, нæ чемпионаты уыди цымыдисаг фембæлдтытæ дæр, фæлæ нæ фæнды, цæмæй ахæмтæ уой зынгæ фылдæр».
2025 азы Ирыстоны чемпионтæ систы: 57 кг – Сохъуырты Георги (Андиаты Сосланы номыл скъола), 61 кг – Гуыдиаты Сæрмæт (Андиаты Сосланы номыл скъола), 65 кг – Сæбанты Алыксандр (Алагиры спортивон скъола), 70 кг – Быгъуылты Зауырбег (Беслæны спортивон скъола), 74 кг – Дзираты Алан (Æрæфы район), 79 кг – Дзукъаты Роберт (Андиаты Сосланы номыл скъола), 86 кг – Бæдтиаты Алыксандр (Хæдарцаты Асланы номыл хъæбысхæсты академи), 92 кг – Тыджыты Зауырбег (Республикон спортивон скъола), 97 кг – Суанты Хъазыбег (Республикон спортивон скъола), 125 кг – Хынцæгты Марат (Андиаты Сосланы номыл скъола).
Баскаты Уырызмæг
